Libran do cárcere os catro acusados polo secuestro expreso dun home na Lanzada
Libran do cárcere os catro acusados polo secuestro expreso dun home na Lanzada
Recoñeceron os feitos e acordaron coa Fiscalía unha pena de 3 anos e un mes, pero non ingresarán en prisión
Terán que pagarlle 2.080 euros á vítima, que retirou a acusación particular hai meses
Pedíanlles dez anos e medio de prisión e finalmente van ser tres, pero non chegarán a entrar no cárcere. É o acordo ao que chegaron os catro acusados dun secuestro expreso en Sanxenxo en 2017.
Foi unha noite do mes de xuño. A vítima dirixíase ao coche despois de facer deporte, cando dous homes embozados o asaltaron no aparcadoiro. Con golpes e ameazas, quitáronlle os cartos -uns 240 euros-, o móbil e a tarxeta.
Retivérono cousa dunha hora, mentres outros dos acusados foron sacar máis cartos ao caixeiro. Conseguiron facerse con outros 340 euros pero, segundo o escrito da Fiscalía, cando esgotaron o tope de retirada esixiron un rescate de 1.500 euros. Entregounos en Sanxenxo un familiar da vítima para liberalo.
En 2018, tirando do fío doutra investigación, identificaron e detiveron os catro acusados. A fiscalía pedía para eles cinco anos e medio por detención ilegal e outros cinco anos por roubo con intimidación. O xuízo tiña que arrancar na Audiencia Provincial de Pontevedra pero non chegou a celebrarse porque houbo acordo.
Os acusados recoñeceron os feitos, e con ese atenuante de confesión e o de dilación indebida polo tempo que pasou, a pena reduciuse a tres anos e un mes. Quedan libres de ir a prisión coa condición de non delinquir en dous anos e de pagar unha multa.
A vítima retirou a acusación particular. Terán que aboarlle 2.080 euros pola contía subtraída, e sumarlle outra indemnización polo delito leve de estafa.
