Longas ringleiras en Lugo para conseguir gangas nun mercado efémero de moda vintage

Longas ringleiras pola mañá e máis longas aínda pola tarde. Durante todo o día houbo que facer cola, de ata tres horas de espera, para poder acceder ao mercado efémero de moda vintage instalado no principal hotel de Lugo. Entre a clientela, abundaba sobre todo xente nova. E para non ter que agardar tanto tempo, os clientes tamén teñen a opción de pagar por uns pases que lles permiten entrar axiña.

Unha vez dentro, os asistentes teñen á súa disposición moreas de pezas de roupa, que poden adquirir por dez euros cada unha. Dende camisetas ata suadoiros, pantalóns ou mesmo abrigos de coiro. A organización do evento corre a cargo dunha firma valenciana, que cada fin de semana leva o seu mercado vintage a unha cidade distinta.

Felip Peña, organización do mercado efémero: "Nós dedicámonos a conseguir cantidades estratosféricas de roupa, moitas toneladas. Preparámolas e filtrámolas nunha nave, posto que non toda vén ao evento".

Ata o domingo, prevese que pasen por este mercado milleiros de persoas, que disporán dun máximo de media hora por quenda para se faceren coas gangas polas que tanto agardaron.