López Obrador fala dunha nova "nacionalización" tras comprar 13 plantas a Iberdrola

Iberdrola vende o 80 % do seu negocio en México ao Goberno de López Obrador. Son 13 plantas de xeración eléctrica. A operación ten un valor de 5.500 millóns e remata con anos de tensións. A multinacional española celebra o acordo e di que seguirá investindo, pero só en renovables. 

O presidente mexicano, Andrés Manuel López Obrador, anunciou que a compra por uns 6.000 millóns de dólares das 13 plantas a Iberdrola, supón unha "nova nacionalización" xa que pasarán a formar parte do "patrimonio público" operadas pola Comisión Federal de Electricidade.

O mandatario mexicano fixo o anuncio acompañado do secretario de Facenda, Rogelio Ramírez de la O, do director da CFE, Manuel Bartlett, así como de Ignacio Sánchez Galán, presidente global de Iberdrola, Enrique Alba, director xeral de Iberdrola México e David Mesonero, director xeral de desenvolvemento de Iberdrola.

Xuntanza entre o Goberno de México e os directivos de Iberdrola

Sánchez Galán resaltou que o acordo chega tras dous anos de negociacións e ten “o espírito do respecto ás políticas de cada un dos países onde estamos”.

Afirmou que entenden a política enerxética do presidente López Obrador, o que levou á empresa española a “buscar unha situación que sexa boa para o pobo de México e que ao mesmo tempo cumpra cos intereses dos accionistas”.

“O noso desexo é traballar da man do Goberno de México naquilo que podamos axudar en beneficio dos mexicanos”, agregou o directivo de Iberdrola Sánchez Galán.

López Obrador explicou tamén que con esta transacción a Comisión Federal de Electricidade pasa de xerar 39,6 % a 55,5 % de toda a enerxía do país.