Lugo fai historia e supera por primeira vez os 100.000 habitantes
Lugo fai historia e supera por primeira vez os 100.000 habitantes
Esta cifra supón un importante incremento da poboación censada oficialmente no municipio, dado que o dato ao 1 de xaneiro de 2023 era de 98.214 habitantes
A cidade de Lugo fai historia ao superar por primeira vez os 100.000 habitantes, de modo que se converte na cuarta urbe galega en exceder esa cifra de residentes -por detrás de Vigo, A Coruña e Ourense-.
Para poñer en valor esa cifra de habitantes e o que supón para a cidade de Lugo, a alcaldesa, Paula Alvarellos (PSdeG), e o tenente de alcalde, Rubén Arroxo, compareceron nunha conferencia de prensa conxunta que tivo lugar este martes.
Segundo os datos do Padrón Municipal, Lugo conta hoxe con 100.060 habitantes, de modo que supera a barreira dos 100.000 residentes, un vello obxectivo do Goberno municipal que vén mesmo da época do socialista José López Orozco como alcalde da capital lucense.
En realidade, esta cifra supón un importante incremento da poboación censada oficialmente no municipio, dado que o dato ao 1 de xaneiro de 2023 era de 98.214 habitantes, segundo informou Rubén Arroxo. “Son 1.500 persoas máis durante un ano, o que é moi relevante”, dixo o tenente de alcalde, quen opina que, dun tempo para acó, percíbese “unha cidade moito máis dinámica”. “Nos seus dous mil anos de historia, por primeira vez, a cidade de Lugo supera esa cifra”, engadiu Arroxo, quen insistiu en que “se percibe, sen ningunha dúbida, unha cidade con máis vida”.
O concello de Santiago acada tamén os cen mil habitantes censados
O informe do padrón municipal reflicte que a 25 de xuño a capital galega conta con 100.384 persoas rexistradas.
O Concello valora en positivo que a poboación rexistrada no padrón municipal se achegue cada vez máis á poboación real.
Un informe encargado polo Consello Económico e Social sinala que Santiago conta cunha das poboacións flotantes máis elevadas de España cunhas 26.000 persoas.
