Luis López confirma que presidirá a Deputación de Pontevedra
Luis López confirma que presidirá a Deputación de Pontevedra
As dúas vicepresidencias serán para os candidatos do PP ás alcaldías de Vigo e Pontevedra, Marta Fernández Tapias e Rafael Domínguez
"Imos gobernar para todos os concellos, para os 61, sen sectarismo", asegura López
O exdelegado da Xunta de Galicia en Pontevedra e presidente do PP na provincia, Luis López, confirmou este venres que presidirá a Deputación pontevedresa e terá como vipresidentes aos candidatos do PP ás alcaldías de Vigo e Pontevedra, Marta Fernández Tapias e Rafael Domínguez, respectivamente.
"O presidente Rueda e os 61 representantes das agrupacións do PP na provincia tiveron a ben propoñerme como presidente da Deputación, algo que considero unha honra, un orgullo, e que tentarei desenvolver coa máxima humildade e o mellor dos traballos", dixo López en conferencia de prensa.
"Sempre dixen que eu non busco protagonismos pero tampouco fuxo das responsabilidades, e se o partido, co presidente Alfonso Rueda á cabeza, cre que son a persoa idónea para este posto asúmoo con total naturalidade, tranquilidade e, por suposto, agradecemento infinito aos meus compañeiros, tentarei estar á altura de tanta responsabilidade", engadiu.
Posteriormente, López dixo que o PP sempre traballa e en equipo, motivo polo que compareceu xunto a Tapias e Domínguez, a quen presentou como vicepresidentes da Deputación.
Segundo explicou, Tapias, "gran coñecedora e máxima defensora" de Vigo e a súa área, terá o seu foco de traballo alí, mentres que Domínguez centrarase na capital provincial.
O futuro presidente da Deputación afirmou que se trata de "magníficas eleccións" por parte dos compañeiros do PP na provincia, "xa que tanto Marta como Rafa conseguiron uns grandísimos resultados electorais, lideran proxectos á alza, coñecen á perfección Vigo e Pontevedra e o futuro destas dúas cidades estamos convencidos de que pasan por eles".
López non quixo desvelar máis detalles do equipo de Goberno, o cal podería variar en función do que suceda este sábado, coa constitución dos gobernos municipais, actos aos que non quixo restar protagonismo.
Si adiantou, en clara mensaxe á súa predecesora á fronte da Deputación, Carmela Silva, o que definiu como un eixo estratéxico da xestión que pensa levar a cabo á fronte do Goberno provincial.
"Imos gobernar para todos os concellos, para os 61, sen sectarismo, porque todos son absolutamente igual de importantes e é unha cuestión en que a Deputación ten que mellorar con respecto aos últimos tempos", asegurou.
