Rovira prevé regresar a Cataluña este sábado logo do arquivo do Caso Tsunami
Rovira prevé regresar a Cataluña este sábado logo do arquivo do Caso Tsunami
A secretaria xeral de ERC di que lle encantaría estar en Barcelona xa este sábado para participar de forma presencial nunha asemblea de mulleres
Logo de seis anos en Suiza, asegura que non ten claro se volver xa porque aínda non se arquivou a causa no Tribunal Supremo
![A secretaria xeral de ERC Marta Rovira intervén de maneira telemática nun mitin de ERC en maio en Pineda de Mar (Kike Rincón / Europa Press)](https://img-g24-crtvg.flumotion.com/prog24/2024/20240531/EuropaPress_5936032_secretaria_general_erc_marta_rovira_interviene_manera_telematica_mitin_erc.jpg)
A secretaria xeral de Esquerra Republicana de Cataluña Marta Rovira, instalada en Suíza desde 2018 para evitar a xustiza, dixo este martes que lle encantaría estar en Barcelona xa este sábado para participar de forma presencial nunha asemblea de mulleres convocada polo partido.
Así o dixo en declaracións a Rac1 o día despois de que o xuíz da Audiencia Nacional Manuel García-Castellón arquivase o caso Tsunami tras declarar a Sala do Penal a invalidez das dilixencias desde o 29 de xullo de 2021. Nela figuraban dez persoas investigadas, entre elas Rovira.
A dirixente republicana explicou que aínda non tomou a decisión definitiva sobre cando volver, xa que segue á espera de como poden reaccionar as acusacións particulares e do que lle poden dicir os seus avogados.
Con todo, a súa intención é estar o sábado en Barcelona e pasar previamente polo seu Vic natal para estar coa súa familia, nun momento en que a súa filla está xa de vacacións en Cataluña.
Rovira indicou que se hai algo que a fai dubidar sobre a súa volta xa a territorio catalán é que aínda non se arquivou a mesma causa no Tribunal Supremo, en que están investigados por terrorismo o expresidente catalán Carles Puigdemont e o deputado de ERC Rubén Wagensberg, que no seu caso tamén reside en Xenebra (Suíza).
A secretaria xeral de ERC censurou que o maxistrado García-Castellón prorrogase as investigacións "sen parar", o que lle deu "a posibilidade de politizar" a causa.
Por iso, afirmou que "é de certa xustiza poética" que finalmente esta se arquivase por un erro de procedemento.
Sobre o seu futuro persoal, indicou que decidirá xunto á súa parella e a súa filla se trasladarse definitivamente a Cataluña ou manter a residencia en Xenebra, dado que tras seis anos aí xa estableceu moitos "lazos" nesa cidade.
Rovira sempre dixera que volvería a Cataluña cando se pechase a causa de Tsunami Democràtic pola que o xuíz a investigaba por un delito de terrorismo.
O arquivo desta causa súmase a que hai uns días o xuíz do Tribunal Supremo Pablo Llarena lle retirou a súa orde nacional de detención. Ese maxistrado considerou que o delito de desobediencia polo que estaba procesada Rovira entra "no ámbito de aplicación" da lei de amnistía.