Medio cento de familias de Narón quedan sen luz con cada temporal
Aseguran que os cortes na subministración eléctrica son habituais porque o transformador é moi antigo
Cada vez que a Axencia Estatal de Meteoroloxía bautiza unha nova borrasca, na parroquia naronesa de San Xiao sacan dos caixóns as candeas e as lanternas. Xa é un xesto mecánico, unha rutina invernal imposta polos constantes cortes de luz. O último durou tres días.
Na Revolta, a información meteorolóxica recibe unha atención preferente.
"Miramos o tempo e se vén temporal sacamos as candeas", relata Fina, unha das veciñas afectadas.
Fina tira de candeas e o seu veciño Fernando, de lanternas. Atesoura unha ducia delas e gárdaas estratexicamente por toda a casa. Tamén ten máis que amortizado un xerador. Asegura que os cortes de luz e os fallos na subministración eléctrica son de toda a vida e dirixe a mirada cara ao antigo transformador.
"Ese transformador é máis vello ca min, que son vello dabondo. Necesitamos unha solución real non parches", láiase.
Cando fala de parches refírese a un xerador temporal que a compañía distribuidora activou despois de que a última borrasca os deixara sen luz varios días. Hai polo menos medio cento de familias afectadas polos cortes e polos danos ocasionados polas alteracións na corrente.
"Foise a luz e cando volveu, veu a 3,80. Rebentounos todos os electrodomésticos", afirma Fina.
O vello transformador, sentencia na Revolta, necesita remuda imperiosamente.
