Micovic aterra no Obradoiro
Micovic aterra no Obradoiro
O ala-pivote serbio procede do BC Jonava lituano, onde anotou 13 puntos de media a tempada pasada
Trátase dun xogador cun gran tiro exterior
![](https://img-g24-crtvg.flumotion.com/prog24/2024/20240724/micovic.jpg)
O Obradoiro continúa a reforzar o seu cadro para esta tempada. Agora é a quenda de Strahinja Micovic, un 4 serbio capaz de anotar desde a liña de tres puntos. O interior convértese na oitava incorporación para o conxunto santiagués, que aspira a volver á Liga ACB.
Micovic chega ao Fontes do Sar desde o BC Jonava de Lituania. En terras bálticas mediou 13 puntos e case cinco rebotes. Uns números que se viron incrementados na FIBA Europe Cup, na que anotou máis de 16 puntos e capturou máis de sete rebotes de media por partido. O xogador de 32 anos conta cunha dilatada experiencia na elite do baloncesto europeo, e pasou previamente por equipos doutros países, como Alemaña, Bosnia, Montenegro ou a súa Serbia natal.
A súa alta porcentaxe de acerto desde a liña exterior convérteo nunha grande ameaza para as defensas rivais. Un xogador de garantías para o Obradoiro, que gaña centímetros coa fichaxe e ve reforzada a súa parcela ofensiva.