Milei ou Massa: A Arxentina despexa este domingo a incógnita de quen será o seu novo presidente
Milei ou Massa: A Arxentina despexa este domingo a incógnita de quen será o seu novo presidente
Os arxentinos iniciaron este venres o período de reflexión para a segunda volta das eleccións presidenciais, en que se definirá se un peronista ou un ultradereitista gobernará o país desde o próximo 10 de decembro
![Milei e Massa, este xoves no peche da campaña electoral](https://img-g24-crtvg.flumotion.com/prog24/2023/20231117/mileimassacollage.jpg)
Os arxentinos iniciaron este venres o período de reflexión para a segunda volta das eleccións presidenciais do próximo domingo, en que se definirá entre o oficialista Sergio Massa e o opositor Javier Milei quen gobernará o país suramericano desde o próximo 10 de decembro.
Desde as 8 da mañá está prohibido levar a cabo actos proselitistas e difundir avisos de campaña polos medios masivos de comunicación, ademais da venda de bebidas alcohólicas e os espectáculos públicos ao aire libre ou en recintos pechados e os eventos teatrais e deportivos durante o domingo.
O ministro de Economía arxentino e candidato peronista, Sergio Massa, e o deputado libertario Javier Milei aproveitaron ata o final para pedir apoio aos votantes nos medios de comunicación e as redes sociais.
Milei, líder da formación de ultradereita La Libertad Avanza, elixiu a central provincia de Córdoba, o segundo maior distrito electoral do país, para pechar a súa campaña cun acto masivo, de ton eufórico e certo aire triunfalista:
"É importante que este domingo nos poñamos en pé, deamos volta á historia e iniciemos o camiño da reconstrución arxentina", sinalou Milei, quen para rematar o seu acto asegurou: "Os votos están e imos gañarlles. Viva a liberdade, carallo!".
Massa, pola súa banda, optou por pechar a campaña con encontros diversos, en ámbitos pechados e con públicos ben definidos: expuxo a súa proposta nun encontro organizado polas principais entidades empresariais do país e reuniuse con estudantes dun colexio de secundaria público de Bos Aires.
"Teñan a plena seguridade que, se teño a responsabilidade de gobernar A Arxentina, vou deixar a miña alma e toda a miña forza para que construamos ese país que hoxe é unha utopía, pero que o podemos facer realidade", asegurou Massa ante os estudantes.
Tras a primeira volta do pasado 22 de outubro, en que Massa sorprendeu cun primeiro posto (36,78 %) e Milei -gran gañador das primarias de agosto- quedou relegado ao segundo lugar (29,99 %), a campaña foi sumando tensión política.
A decisión do expresidente Mauricio Macri e de Patricia Bullrich, terceira na elección de outubro e presente no acto de peche de Milei deste xoves, de dar o seu apoio ao libertario abriu fendas na coalición de centrodereita Juntos por el Cambio, onde varios dirixentes declaráronse neutrais e outros, sen dar apio explícito a Massa, rexeitaron apoiar o ultradereitista.
A alianza Macri-Milei tamén dividiu a propia La Libertad Avanza, algúns de cuxos membros rexeitan aliarse co exmandatario, integrante da 'caste política' que tanto criticaron.
Massa, en tanto, prometeu formar un Goberno de unidade e incorporar opositores e logrou no camiño sumar a adhesión dalgúns peronistas disidentes.
Mentres, na gobernante fronte Unión por la Patria, tanto o presidente arxentino, Alberto Fernández, como a vicepresidenta, Cristina Fernández, mantivéronse á marxe da campaña, dando todo o protagonismo ao líder de Frente Renovador, terceira maior forza dentro da coalición oficialista.
As enquisas deixan todo no aire
A campaña estivo centrada na economía, cuxos desequilibrios fan temer no país unha crise aguda inminente, un escenario para o que Massa e Milei expoñen saídas absolutamente diferentes, expondo serios dilemas aos 35,8 millóns de arxentinos que este domingo acudirán ás urnas.
Aínda así, tamén foron temas sobre a mesa a seguridade, o rol do Estado e os dereitos humanos, asuntos que mesmo permearon o debate obrigatorio entre ambos os candidatos celebrado o pasado domingo, no que Massa foi claro vencedor pola súa astucia para manexar os intercambios e os tempos.
Con todo, o resultado do domingo é unha incógnita. Hai unha gran porcentaxe de indecisos e das nove enquisas publicadas nas últimas semanas, cinco dan vantaxe a Milei e catro, a Massa, pero con diferenzas entre ambos os que na maioría dos casos entran na marxe de erro de toda sondaxe.
As cartas están botadas e quen gañe o vindeiro domingo por maioría simple conducirá A Arxentina desde o 10 de decembro e por un período de catro anos, con maiúsculos desafíos políticos, económicos e sociais esperando na Casa Rosada.
O sufraxio é obrigatorio na Arxentina para os cidadáns entre 18 e 70 anos e optativo para quen supere esa idade e para os adolescentes de 16 e 17 anos, ademais de para residentes no exterior.