Milleiros de apicultores rematan estes días a campaña coa castra do mel

Estímase que en Galicia hai unhas 4.500 explotacións apícolas, cunhas 200.000 colmeas. As primeiras que se esmelgaron foron as da costa, mentres que as últimas están a ser as da montaña. Unhas e outras tiveron unha colleita en xeral escasa debido á abundante chuvia deste ano.

Unha vez retirados os panais das colmeas, un labor que se adoita realizar polas mañás nos apiarios, pola tarde toca traballar no obradoiro. Aquí é onde os apicultores lles retiran o opérculo, esa fina capa de cera que sela o mel, antes de centrifugalos.

Manuel Sande, secretario da Asociación Provincial de Apicultores de Lugo: "Quítaselle ese opérculo ao cadro e vai ao extractor, una centrifugadora onde o mel sae cara aos laterais. E logo déixase decantar un par de días para eliminar as impurezas".

Considérase que un mel é monofloral cando a procedencia dunha soa especie supera un mínimo da produción que pode variar entre o 35 e o 70 por cento en función da planta.

O mel centrifúgase no extractor, decántase e madura durante 20 días antes de ser envasado

Ao contrario que a colleita da costa ou da montaña, con predominancia do eucalipto e do breixo respectivamente, a das zonas baixas do interior si que foi boa este ano.

Manuel Sande, secretario da Asociación Provincial de Apicultores de Lugo: "Vai haber moi pouco mel de eucalipto este ano, e van saír meles monoflorais sobre todo de silva e de castiñeiro".

Tocante aos prezos, oscilan entre os tres euros e medio o quilo a granel e os dez euros de venda ao público por parte dos pequenos produtores, que a fin de semana vindeira teñen unha importante cita en Lugo na trixésimo primeira edición da Feira do Mel.