Morre con 114 anos a muller máis lonxeva de España e a novena do mundo

A estremeña Silveria Martín Díaz, que o pasado mes de agosto se converteu, aos seus 114 anos, na muller máis lonxeva de España e a novena persoa de maior idade do mundo, faleceu este mércores.

Silveria vivía nunha residencia de maiores da localidade cacereña de Villanueva de la Vera, segundo informou a web Estremeños Centenarios, que deu a coñecer a noticia do seu deceso.

Naceu o 20 de xuño de 1910 en Talavera la Vieja, coñecida como Talaverilla, o lugar cacereño que en 1963 se converteu en encoro, no pantano de Valdecañas.

E alí criouse, casou con José o Retratista, como o coñecían os seus veciños; naceron os seus cinco fillos, e viviron ata que cumpriu os 53 anos, ata que chegou a orde de desaloxo do lugar e a familia tivo refacer a súa vida noutro sitio.

Silveria e o seu marido pasaron un ano en Rosalejo, o municipio de colonización en que se asentaron o 80 por cento dos veciños de Talaverilla, pero logo acabou emigrando a Francia cos seus fillos, onde marcharon para traballar.

Ela sempre se dedicou á súa familia e ao seu fogar, "encantáballe cociñar, facer punto, gancho, non podía estar parada na casa, foi e é unha muller moi activa", sinalaba no seu 112 aniversario a súa filla Julia Arroyo Martín.