Morre unha muller de 66 anos ao caer desde un cuarto andar en Ferrol

Aconteceu nun inmoble da praza Pintor Segura Torrella. Ao parecer, a vítima, de 66 anos, estaba limpando os cristais dunha ventá da casa cando, por causas que aínda se descoñecen, se precipitou ao baleiro desde o cuarto andar.

O propietario do ximnasio que está xusto en fronte foi o primeiro en dar a voz de alarma. Porén, os sanitarios nada puideron facer por lle salvar a vida.

A muller faleceu por mor do forte golpe que recibiu. Aconteceu ás cinco da tarde deste luns, a escasos metros dun parque infantil, onde daquela non había ningún neno xogando.

Ao lugar tamén se desprazaron funcionarios xudiciais, que autorizaron o levantamento do cadáver e o seu traslado ao hospital Naval para practicarlle a autopsia, que revelará as causas do falecemento.