Morre unha muller en Amoeiro intoxicada por acumulación de gas na súa vivenda

Unha muller de idade avanzada faleceu na mañá deste xoves no municipio ourensán de Amoeiro ao intoxicarse por acumulación de gas na súa vivenda.

Diso informou o CIAE 112 Galicia, que recibiu o aviso ás 11:10 horas dunha veciña que se achegou á casa da falecida, situada na estrada OU-0524 ao seu paso pola parroquia de Parada de Amoeiro.

Desprazados ao lugar, o persoal sanitario de Urxencias Sanitarias 061 unicamente puido certificar a morte da ocupante da casa.

Pola súa banda, os profesionais do parque de bombeiros comarcal do Carballiño encargáronse de realizar tarefas de ventilación. A Garda Civil abriu unha investigación sobre os feitos.