Morren dezaseis persoas no ataque israelí a unha escola da UNRWA no centro de Gaza

Un ataque israelí contra unha escola da axencia da ONU para persoas palestinas desprazadas (UNRWA) deixa polo menos 16 persoas falecidas. Segundo confirmou o Ministerio de Sanidade da Franxa, outras 75 quedaron feridas.

O centro educativo, situado no campo de refuxiados de Nuseirat, albergaba unhas 2.000 persoas segundo a UNRWA e 7.000 segundo as autoridades locais.

"O exército de ocupación israelí cometeu un novo masacre no campamento de Nuseirat en horas da tarde deste sábado, ao bombardear con avións de combate a escola Al Jaouni, onde hai aproximadamente 7.000 persoas desprazadas", indicou o Goberno gazatí.

A Defensa Civil de Gaza denuncia que entre 800.000 e 1 millón de civís están atrapados no centro da franxa de Gaza, obxectivo dos ataques hebreos das últimas horas.

Un voceiro da UNRWA asegura que lle proporcionan ao Exército israelí "as coordenadas das escolas que albergan persoas desprazadas dúas veces ao día".

"Masacre número 43"

Segundo o Goberno gazatí, é o "masacre número 43 cometido pola ocupación durante a guerra xenocida no campo de Nuseirat", onde viven 250.000 persoas.

"Desde o comezo da guerra de xenocidio, a ocupación bombardeou máis de 17 escolas e centros de desprazamento e refuxio no campo de refuxiados de Nuseirat", agregou.

Ademais, outras 25 persoas morreron este sábado, entre elas cinco xornalistas, noutros ataques nesta zona e en Deir al Balah.