Multitudinaria procesión do Xan de Arzúa en Allariz
Multitudinaria procesión do Xan de Arzúa en Allariz
Preto de 800 veciños participaron na recreación histórica polas rúas da vila
Atribúen a Xan de Arzúa a orixe da Festa do Boi, hai máis de 700 anos
Conta a historia que alá polo 1.317 o fidalgo Xan de Arzúa subiu ao lombo dun boi para escorrentar os xudeus que boicoteaban a procesión do Corpus.
"E como bos cristiáns, imos velar por que a procesión teña un bo fin e establecer unha boa convivencia e que os xudeus se integren na festa e na procesión do Corpus", explica un dos participantes.
Cada ano, os veciños reinventan a historia mudando o guión para xogaren co público. Nesta edición participaron na posta en escena 756 persoas. Levan máis dun mes ensaiando. A rúa é o seu escenario.
"Con moita paixón e moitas ganas, e co esforzo de toda a xente porque, sen ese esforzo, sería imposible todo isto", explica Martín Quintana, que leva nove anos organizando a procesión.
Esta é tamén en Allariz unha xornada de convivencia, caracterizados os veciños de distintos gremios medievais.
E isto é só un anticipo, a proba do boi, porque a semana grande empeza agora, ata o vindeiro domingo, 11 de xuño.
