Nin a calor nin o San Xoán lle restaron esplendor ao Arde Lucus

A primeira edición internacional do Arde Lucus deixou un bo sabor de boca entre as asociacións que participan na festa. Destacan que nin o San Xoán nin a vaga de calor lle quitaron brillo a un evento que segue a ser multitudinario e que se consolida como cita obrigada.

"Foi moi caloroso e houbo moitísima xente, con moito estranxeiro. Había moita xente sen caracterizar, que se notaba que era de fóra e era a primeira vez que viña", di Montse Mourelos, presidenta de Salesiani Luci Augusti.

"Eu creo que cada vez se vai perfeccionando máis. E iso é o que lles hai que pedir a todos os participantes, incluso aos que veñen de fóra", cre Adolfo de Abel Vilela, historiador.

"Para o comercio foi sorprendentemente bo. A xente pensaba que a coincidencia do inicio das rebaixas co Arde Lucus ía ser problemático, pero non. O venres pola tarde e o sábado pola mañá houbo moita venda", explica Luís Latorre, presidente de Lugo Monumental.

O Arde Lucus 2023 deixou para o recordo un ronsel de máis de 400 actividades para todos os públicos. O circo romano, os desfiles ou os concertos figuran entre os que gozaron dun maior seguimento. Tocante á ocupación hoteleira, oscilou entre o 80 por cento e o cheo total do sábado.

"As previsións cumpríronse, sobre todo a noite do sábado, na que tiñamos previsto facer cheo. Logramos en varios hoteis da cidade chegar ao cento por cento", conta Jacobo García-Bobadilla, secretario da Asociación Provincial de Hostaleiros de Lugo.

Rematado o Arde Lucus, as multitudes desprazaranse agora cara ao extremo norte da provincia de Lugo. Nun par de días, agárdase que unha marea humana comece a invadir a vila de Viveiro co inicio do Resurrection Fest, un festival do que este ano se agarda un impacto económico de máis de 17 millóns de euros.