Prisión para o agresor da primeira ministra danesa nun acto "espontáneo"

O xulgado de Frederiksberg (Dinamarca) decretou este sábado prisión preventiva, ata o 20 de xuño, para un cidadán polaco de 39 anos por agredir no centro de Copenhague a primeira ministra danesa, Mette Frederiksen, no que a policía describe como "acto illado e espontáneo".

"Vémolo como un acto illado e espontáneo, e nestes momentos non temos como hipótese da nosa investigación que se trate dun ataque planeado contra a primeira ministra", afirmou a inspectora da Policía de Copenhague, Trine Møller, á axencia Ritzau tras a vista con restricións celebrada este sábado.

O individuo, acusado de agresión contra un funcionario público, negou os cargos durante a vista, e segundo o informe policial, estaba claramente influído polo alcol e outras drogas cando foi detido, un minuto despois de golpear co puño a Frederiksen nun brazo e empuxala.

O arrestado, que reside en Dinamarca desde hai uns meses, dixo no interrogatorio non lembrar moito do ocorrido e admitiu recoñecer a mandataria, pola que amosou simpatía. 

Reaccións

O incidente provocou numerosas reaccións de condena e de solidariedade coa agredida por parte de membros do Goberno danés e dos líderes dos principais partidos políticos.

Mandatarios doutros países, como os primeiros ministros de Portugal e Italia e o presidente de España, Pedro Sánchez, enviaron tamén mensaxes de apoio a Frederiksen.

"Mette Frederiksen é unha líder comprometida, unha magnífica persoa e unha grande amiga. O ataque que sufriu esta noite é un ataque contra todos os que cremos nunha Europa de liberdade, tolerancia e paz", publicou Sánchez na súa conta da rede social X.

Mette Frederiksen, de 46 anos, ocupa a xefatura de goberno desde xuño de 2019: a primeira lexislatura, á fronte dunha coalición de centroesquerda; e desde decembro de 2022, á cabeza dun executivo de centro con dúas forzas de dereita.