O alcalde de Ourense anuncia que non volverá convocar a xunta de voceiros no que resta de mandato

O alcalde de Ourense, Gonzalo Pérez Jácome (Democracia Ourensana), anunciou que non volverá convocar a oposición a ningunha xunta de portavoces no que resta de mandato despois de que os grupos políticos non se pronunciasen sobre as propostas que lles trasladou a para eliminar a ORA e valorar a posible entrada de novos accionistas no Club Ourense Baloncesto.

Nun comunicado remitido aos medios, o rexedor considera que os grupos políticos "o que fixeron foi marear a perdiz", sen pronunciarse en ningún sentido e apelando a que "necesitan máis informes e facer reunións entre partes", entre outras cuestións. Todo iso, considerou co obxectivo de "marear a perdiz con escusas interminables".

Jácome, que advirte que estas argumentacións "non teñen sentido" tendo en conta que as propostas van a pleno, onde os grupos terán que posicionarse, subliña que no caso do equipo de baloncesto a oposición demanda datos dos accionistas que estarían interesados.

"É algo absurdo porque o que temos que decidir é se estamos dispostos a vender as accións do Concello e ofrecelas no mercado para dar entrada a novos accionistas", sinalou para asegurar que este asunto, ademais, non admite moita dilación tendo en conta que "hai que planificar a próxima tempada".

Neste sentido, explica o rexedor, a falta de pronunciamento político dos grupos municipais deixa "bloqueados" os dous asuntos: tanto a supresión da ORA como a posible entrada de novos accionistas no COB.

Ante este escenario, o alcalde comunicoulles os portavoces que a deste martes foi a "derradeira vez" que os convoca. "No que resta de mandato, nunca máis os chamarei porque o que fan é marear a perdiz, non din nada e bloquean os asuntos".

A oposición esixe a Jácome "concreción" e "transparencia" 

Tras a reunión, todos os grupos da oposición no Concello de Ourense coincidiron en criticar a decisión adoptada por Gonzalo Pérez Jácome.

Deste xeito, a portavoz do PP local, Sonia Ogando, criticou a "falta de seriedade e rigor" do alcalde. "Volvemos ser convocados mediante unha mensaxe a través de WhatsApp, sen convocatoria oficial e tamén sen acta das dúas reunións mantidas", sinalou.

Así mesmo, denunciou a "falta absoluta de planificación" e de "información" ao soster que "de ningunha das cuestións expostas polo alcalde se presentou unha proposta obxectiva nin acompañada dun mínimo de documentación ou de datos".

"O único que temos claro é que quere suprimir a ORA e o Partido Popular non se opón a iso, pero esiximos información veraz e clara", indicou.

Nesta liña, os populares entenden que hai cuestións importantes que teñen que estar definidas, a priori, por exemplo cal é a alternativa de estacionamento para garantir a mobilidade dos ourensáns no centro da cidade.

O PP, ademais, reitera o seu apoio ao COB e sinala que este asunto foi tratado "na mesma liña que o anterior, cunha falta de concreción total".

Neste sentido, o Grupo socialista esixiu máis responsabilidade e pediu tamén máis concreción a Jácome para poder valorar as decisións de suprimir a ORA e vender as accións do COB.

Tras a reunión, os socialistas trasladaron a súa vontade ao alcalde de estudar propostas debidamente acreditadas e rexeitaron dar o seu apoio no pleno ao que cualifican de "caprichos" do alcalde, "con base en castelos no aire sen ningún tipo de garantías para o desenvolvemento".

Así, no que se refire á ORA, a portavoz do grupo municipal socialista, Natalia González, sinalou que a supresión é "competencia do pleno" e que o Goberno local "non ten ningunha alternativa real e concreta sobre o que se vai a facer o día despois".

En relación ao accionariado do COB, o PSOE local sostén que o Concello non pode desfacerse da súa participación no COB se máis, nin sen ter datos ou garantías sobre os posibles investidores.

Ademais, sostivo que non se pode permitir que o alcalde responda "atacando e manifestando que non volverá buscar consensos políticos no que resta de mandato ou que non convocará máis á xunta de portavoces". "A política é consenso. E para facer cidade hai que ter proxecto, non arrebatos", resolveu.

O BNG acusa a Jácome de pedir aos grupos que "que voten a cegas"

Pola súa banda, o BNG tamén lamentou a falta de concreción e información por parte da alcaldía no referido a estes asuntos e acusou ao rexedor de pretender que os grupos "voten a cegas" o que propón.

O portavoz municipal do BNG, Luís Seara, incidiu na necesidade de "contar con documentación e informes técnicos" sobre todos os pormenores de cada unha das propostas para poder avalialas ao detalle e, a partir de aí, poder adoptar unha decisión.

Con todo, lamenta que o alcalde non só non ofreceu ningún tipo de documentación ou información adicional, senón que o que pretende é que directamente lle digan que si ao que o di e que "voten a cegas".

Deste xeito, sobre a ORA critica que o alcalde simplemente diga que existen visións contraditorias a respecto do procedemento para levar a cabo para a posible supresión do servizo, sen achegar ningún informe xurídico nin estudo técnico de como podería afectar á mobilidade na cidade.

No tocante ao accionariado do Club Ourense Baloncesto, Seara lembrou que existe un procedemento xudicial aínda pendente de resolución impulsado polo accionista maioritario, Grupo Hereda, e que "perante a falta de información sobre a situación real da entidade" e o posicionamento da Deputación provincial, que tamén conta cun 16,5 %, consideran necesario que sexa convocada unha reunión de todos os grupos á que asistan todas as partes implicadas para aclarar as dúbidas que poidan existir.