A Executiva do PSOE de Ourense propón a Natalia González para a alcaldía

A Executiva da agrupación municipal do PSOE de Ourense propuxo por aclamación a secretaria socialista, Natalia González, como candidata á alcaldía na moción de censura que negocian a tres bandas, BNG, PP e o Partido Socialista.

Desta forma, o PSOE convértese no primeiro grupo en presentar unha proposta en firme que permita impulsar unha moción de censura e así tratar de apartar ao actual rexedor, Gonzalo Pérez Jácome, un acordo que se prevé difícil despois de que o PPdeG avanzase que non vai seguir negociando mentres o BNG non levante o veto aos populares.

Nun comunicado remitido aos medios, o PSOE ourensán manifestou a súa disposición para "asumir a responsabilidade" de encabezar a moción de censura, para o que pediu "máxima lealdade e xenerosidade" aos outros dous partidos -PP e BNG- para que poida saír adiante o pacto promovido polo grupo socialista.

O obxectivo, apuntou, é "desbloquear a grave situación actual e recuperar a normalidade institucional" no Concello ourensán.