O BCE sobe os tipos de xuro ata o 4,5 %, o seu nivel máis alto en 20 anos

O Banco Central Europeo (BCE) decidiu este xoves subir os seus tipos de xuro por décima vez consecutiva, nun cuarto de punto porcentual, ata o 4,5 %, para frear a inflación da zona do euro e a pesar de que a economía se estanca.

Tras a reunión do Consello de Goberno, o BCE informou de que tamén incrementa en 25 puntos básicos a facilidade de crédito, á que presta aos bancos a un día, ata o 4,75 %, e a facilidade de depósito, á que remunera o exceso de reservas a un día, ata o 4 %. 

"A suba de tipos de hoxe reflicte a valoración do Consello de Goberno das perspectivas de inflación á luz dos novos datos económicos e financeiros, a dinámica da inflación subxacente e a fortaleza da transmisión da política monetaria", sinala o BCE nun comunicado.

Coa suba dun cuarto de punto anunciada este xoves polo BCE, en liña coa adoptada en xullo, o 'Gardián do euro' elevou o prezo do diñeiro en 450 puntos básicos durante o actual ciclo de subidas, que deu comezo en xullo do ano pasado.

 O BCE revisa á alza a previsión de inflación

As novas proxeccións macroeconómicas elaboradas polos expertos do BCE para a zona do euro de setembro prevén unha inflación media do 5,6 % en 2023 (5,4 % previsto en xuño), do 3,2 % en 2024 (3 %) e do 2,1 % en 2025 (2,2 %).

Isto supón unha revisión á alza para 2023 e 2024 e á baixa para 2025, engade a entidade monetaria ao explicar por que subiu de novo os seus tipos de xuro e non realizou unha pausa. A revisión á alza para 2023 e 2024 reflicte principalmente unha suba dos prezos da enerxía.

Ademais, a inflación subxacente continúa sendo intensa, a pesar de que a maioría dos indicadores comezou a moderarse. Os expertos do BCE revisaron lixeiramente á baixa a senda proxectada da inflación excluídos a enerxía e os alimentos, ata unha media do 5,1 % en 2023, do 2,9 % en 2024 e do 2,2 % en 2025.

O BCE revisa á baixa as previsión de crecemento

O BCE observa que as anteriores subas dos tipos de xuro transmítense con forza e que as condicións de financiamento volveron a endurecerse e frean cada vez máis a demanda, o que é un factor importante para que a inflación volva ao obxectivo.

Dado o impacto das subas dos tipos de xuro sobre a demanda interna e o enfraquecemento do comercio internacional, os expertos do BCE rebaixaron significativamente as súas proxeccións de crecemento económico.

Agora esperan que a economía da zona do euro creza un 0,7 % en 2023 (0,9 % previsto en xuño), un 1,0 % en 2024 (1,5 %) e un 1,5 % en 2025 (1,6 %).

O BCE considera que os seus tipos alcanzaron niveis que, mantidos durante un período suficientemente longo, contribuirán de forma substancial ao pronto retorno da inflación ao obxectivo.

Ademais, o BCE di que tomará as próximas decisións sobre o prezo do diñeiro segundo sexan os datos económicos, para determinar o nivel de restrición e a súa duración apropiados. 

A decisión de subir os tipos foi por "unha sólida maioría"

A presidenta do Banco Central Europeo, Christine Lagarde, explicou este xoves que o Consello de Goberno decidiu subir os tipos de xuro nun cuarto de punto por "unha sólida maioría".

A presidenta do BCE tamén dixo que non todos os membros tiveron a mesma opinión e que algúns preferían esperar e manter o prezo do diñeiro nesta reunión. Lagarde engadiu que non discutiron ata onde van subir o prezo do diñeiro como máximo neste ciclo alcista.

Calviño confía en que a subida de tipos do BCE poña fin ao incremento do último ano

A vicepresidenta primeira en funcións, Nadia Calviño, pediu este xoves analizar "con detalle" e escoitar as explicacións BCE sobre a suba de tipos de xuro e que confirmen o que se estaba esperando, "que poña fin ao rápido incremento de tipos do último ano e pase a unha fase de maior estabilidade".

Calviño salientou que España é "o país europeo con maior crecemento e con menor inflación", o que o sitúa nunha situación de "relativa vantaxe" con outros países que ou están en recesión ou teñen un crecemento máis débil ou unha inflación máis importante.