O Celta B empata co cabeiro e confirma a súa crise de resultados

O Celta B perde forza cando entramos no momento chave da temporada. As facianas coas que acabaron o partido, os xestos, son reveladores. Catro puntos dos últimos 15. 

Esta xornada empataron na casa ante o pechacancelas nun encontro frouxo, sen ideas, afastado da chispa que tiñan hai dous meses. O Talavera mesmo tomou vantaxe na última xogada da primeira parte por medio de Escudero.

No segundo tempo, o Celta seguiu a buscalo e mellorou cos cambios. O xusto para acadar o empate nunha acción con deixada de Hugo Álvarez e zapatazo de Clemente Montes. O chileno acababa de entrar no campo. Era o minuto 75. E no 91 o propio Clemente puido darlle volta se chega a atinar cunha cabezada tan torta coma clara. 

1-1 final en Balaídos. Alarmas acendidas no filial que ve como se lle complica -pouco a pouco- entrar na promoción de ascenso.