O Celta-Osasuna será o último partido coa actual bancada de Gol de Balaídos
O Celta-Osasuna será o último partido coa actual bancada de Gol de Balaídos
A bancada de Gol será demolida para levantar no seu lugar unha nova bancada idéntica ao Novo Marcador, con capacidade para 6.400 espectadores
O R. C. Celta informou este mércores de que o partido contra o Osasuna, previsto para o venres 21 de febreiro, será o último no que abrirá a bancada de Gol de Balaídos, a que falta por derrubar para completar a reforma integral do estadio municipal.
“Ese día vivirase un momento único e inesquecible. A bancada de Gol é o último sitio do antigo Balaídos, un lugar onde familias, amigos e xeracións enteiras viviron emocións indescritibles. Aquí celebráronse goles que quedarán para sempre na memoria, e forxouse o amor eterno polas cores celestes para moitos dos nosos abonados”, destaca a entidade galega.
O Celta tamén sinala que a partir do luns 24 de febreiro e ata o luns 3 de marzo comezará a contactar cos coordinadores dos grupos ou co abonado de forma individual para proceder á súa recolocación noutra bancada do estadio.
Este contacto, puntualiza o club vigués no seu comunicado, seguirá unha orde estrita de antigüidade media do grupo ou única se a inscrición foi individual.
A actual bancada de Gol será demolida para levantar no seu lugar unha nova bancada idéntica ao Novo Marcador, con capacidade para 6.400 espectadores.
𝘼𝙏𝘼 𝙋𝙍𝙊𝙉𝙏𝙊 🥹👋🩵 Unha bancada chea de historia e grandes recordos para o celtismo.
— RC Celta (@RCCelta) January 29, 2025
O Celta-Osasuna, derradeiro encontro de Gol previo ao inicio da súa demolición e transformación.
O club contactará aos seus abonados para comezar a asignación de reubicacións.
