O conflito do lixo continúa na Coruña: máis dunha decena de incendios en colectores

Os Bombeiros da Coruña tiveron que intervir de novo durante as últimas horas para extinguir varios colectores que arderon en diferentes rúas da cidade.

Estes feitos prodúcense no medio da folga convocada polo Sindicato de Traballadores da Limpeza (STL), iniciada o pasado 24 de xuño con motivo de "despedimentos inxustificados", "externalización de servizos" e "incumprimentos" do convenio.  

En concreto, ás 23:32 os bombeiros desprazáronse á rúa San Diego, onde foron advertidos do incendio dun colector de lixo que non afectaba a vehículos estacionados.  Cinco minutos máis tarde, os efectivos de emerxencias acudiron á rúa Cabaleiros a apagar un incendio nun colector grande que se atopaba xunto a outros catro que lograron separar. Para a extinción, empregaron un vehículo de mando e unha autobomba.

A partir das 00:00 horas e ata pasadas as 03:00 horas sucedéronse as incidencias nas rúas Falperra, Inés Castro, Rafael Alberti, Eladio Rodríguez González, Santa Lucía, Avenida de Oza, Praza Luís Seoane, rúa Rianxo ou Sinforiano López.

En todos eles non se viron afectados vehículos nin edificios que estiveran nas proximidades dos colectores, excepto na Rúa Rianxo, onde o lume en dous colectores danou a dous turismos.

Este sábado as rúas amenceron con menos bolsas de lixo nas rúas, aínda que hai puntos onde se manteñen. É a medida máis visible do acordo do cadro de persoal da empresa de limpeza que decidiu en asemblea dar un golpe de efecto para reverter a súa imaxe ante os cidadáns e recoller a maior parte dos residuos que están fóra dos colectores.