O Congreso rexeita as propostas alternativas á reforma xudicial impulsada por PP e PSOE
O Congreso rexeita as propostas alternativas á reforma xudicial impulsada por PP e PSOE
Os socios habituais do PSOE lamentaron que a reforma non cambie "nada" e que siga favorecendo o 'lawfare' e Vox considerouno unha mera "repartición" entre PP e PSOE
![](https://img-g24-crtvg.flumotion.com/prog24/2024/20240710/congreso.png)
O pleno do Congreso rexeitou este xoves os textos alternativos presentados respectivamente por Vox e Podemos á reforma xudicial pactada polo PSOE e o PP no marco do seu acordo para a renovación do Consello Xeral do Poder Xudicial (CXPX), unha iniciativa que continúa así o seu percorrido parlamentario na Cámara Baixa.
Ningún grupo apoiou as emendas de totalidade máis aló dos seus asinantes, pero, no caso da de Podemos, Sumar e Junts optaron pola abstención, en lugar do voto en contra. Pola súa banda, ERC, Bildu e o BNG preferiron non participar en ningunha das dúas votacións por considerar que o texto de PSOE e PP non cambia "nada" e segue favorecendo o lawfare.
Unha vez rexeitadas as emendas de totalidade, a reforma da lei do Poder Xudicial e o Estatuto do Ministerio Fiscal que leva a sinatura de PSOE e PP poderá proseguir a súa tramitación no Congreso. En concreto, segundo avanzaron a Europa Press fontes parlamentarias, o martes debaterase en relatorio e o mércores na Comisión de Xustiza. A semana seguinte, o día 23 de xullo regresaría ao pleno para ser aprobada e remitida ao Senado.
Con esta reforma lexislativa os dous grandes partidos buscan poñer fin ás denominadas portas xiratorias na Xustiza, reforzar as maiorías ao aprobar nomeamentos xudiciais e emprazar o novo CXPX a realizar propostas sobre posibles cambios no sistema de elección de vogais.
No seu texto alternativo, Vox propoñía que os xuíces e maxistrados elixisen directamente as doce prazas que teñen reservadas no CXPX mediante un sistema electoral maioritario corrixido de listas abertas no que puidesen participar todos os membros en activo da carreira xudicial. A súa idea era que Congreso e Senado se limitasen a designar os ocupantes de oito asentos que corresponden a xuristas.
Para designar os presidentes dos tribunais e das salas do Tribunal Supremo e os maxistrados deste último, Vox avogaba por fixar a antigüidade como criterio fundamental e, en caso de igualdade de condicións entre dous candidatos, o tempo de servizo na orde xurisdicional ou o coñecemento na materia. No relativo ao Ministerio Fiscal, perseguía que para o nomeamento ou cesamento do fiscal xeral se requirise o acordo favorable do CXPX.
Da súa parte, Podemos aproveitou a súa emenda de totalidade para poñer sobre a mesa unha reforma do acceso á carreira xudicial que combine o actual sistema de oposición cun novo de concurso entre avogados da quenda de oficio con cinco anos de experiencia, para cubrir a metade das prazas de xuíces. Xunto a iso, propoñían un sistema obrigatorio de bolsas por motivos económicos para os opositores.
Á súa vez, demandaba cambiar o sistema de elección de 12 vogais do CXPX, de maneira que, se non se alcanzaba un consenso de tres quintos da Cámara en primeira votación, se puidesen elixir por maioría absoluta con polo menos o voto a favor da metade dos grupos parlamentarios. No caso de que non houbese acordo para elixir os xuristas, suxerían a posibilidade de acometer unha renovación parcial que afectase só a quenda xudicial.