O congreso do PSC abre a precampaña en Cataluña

O inesperado adianto electoral converteu o décimo quinto congreso do PSC no primeiro acto da precampaña catalá. Houbo que modificar sobre a marcha a orde do día para incluír a designación de Salvador Illa como candidato a presidir a Generalitat.

Na apertura do conclave, o expresidente Zapatero falaba dos comicios máis importantes dos últimos 25 anos: "son as eleccións nas que Cataluña ten a inmensa oportunidade de abrir unha etapa definitiva de convivencia, de afirmación da pluralidade, de recoñecemento da diversidade".

Zapatero ironizaba coa presunta connivencia entre o PSC e Esquerra... para adiantar os comicios antes de que Puigdemont sexa amnistiado.

O presidente da Generalitat tamén o desmentía: "non, de ningún xeito, de feito nin informei o Partido Socialista, non tiña porque facelo, da miña intención de convocar eleccións antes de que fora pública", dixo Pere Aragonès.

En calquera caso, na círculo do expresident din que Puigdemont está disposto a someterse a unha eventual investidura, mesmo se iso supón a súa detención.

Confirmábao o seu avogado, Gonzalo Boye: "Si, si, sen dúbida. Non lle caiba ningunha dúbida. De feito, o medo é ese, non só que o presidente participe nunhas eleccións e as gañe, senón que vaia a unha sesión de investidura".

Ciudadanos anunciou que, en caso de confirmarse, impugnará a candidatura de Puigdemont por estar censado fraudulentamente en Cataluña pese a levar máis de 6 anos vivindo en Bélxica.