O Congreso inicia a reforma constitucional para eliminar o termo "diminuídos"

O pleno do Congreso debate este martes a toma en consideración da iniciativa impulsada polo PP e o PSOE para reformar o artigo 49 da Constitución e eliminar o termo "diminuídos" para substituílo por "persoas con discapacidade".

Para aprobar a que será a primeira reforma social da Carta Magna, reclamada durante décadas pola entidades da discapacidade, requírese o apoio dunha maioría de polo menos tres quintos da cámara, que está garantida pola representación de socialistas e populares, polo que non se esperan sorpresas.

Ao realizarse a reforma por tramitación directa e en lectura única, tras o debate do pleno abrirase un prazo para presentar emendas, xa anunciadas polo menos por PNV e Compromís, e está prevista a súa aprobación no Congreso este xoves para a súa remisión ao Senado.

Compromís, integrado en Sumar, reclamou nunha emenda recuperar o Dereito Civil valenciano, mentres que o PNV vai pedir incluír na Constitución o dereito para decidir de Euskadi. Tamén ERC estuda presentar algunha proposta, pero relativa ao artigo 49.

Non se espera que ningunha saia adiante, xa que o PP e o PSOE pactaron que só se aceptarían de común acordo e que, en calquera caso, os cambios na Carta Magna se cinguirían ao artigo 49.

As entidades sociais reclamaron aos grupos que apoien por unanimidade o cambio constitucional, que Vox xa desvelou que non vai apoiar.