O Congreso valida a reforma que mellora a contía do subsidio por desemprego

O pleno do Congreso dos Deputados validou este xoves, coa abstención de PP e Vox, o decreto lei que reforma o subsidio por desemprego mellorando a contía, ampliando o número de colectivos beneficiarios e sendo compatible cun traballo.

Con 178 votos a favor, ningún en contra e 171 abstencións, o Congreso deu luz verde a esta reforma que se presentaba por segunda vez, tras ser rexeitada en xaneiro, e que forma parte dun dos fitos comprometidos con Bruxelas para o cuarto desembolso dos fondos europeos.

A reforma será tramitada como proxecto de lei polo procedemento de urxencia.

A vicepresidenta segunda do Goberno e ministra de Traballo, Yolanda Díaz, defendeu que amplía os dereitos "da xente traballadora" para que sentan "verdadeiramente protexidas".

"Fronte á caridade que defenden algúns, a estigmatización do desempregado ou a retórica dos maleantes, nós dicimos: dereitos, dereitos e dereitos", deixou claro a ministra de Traballo, quen rexeitou que o sistema de protección social se fundamente "nunha paguiña".

Durante a súa intervención, a ministra recoñeceu as achegas á reforma realizadas pola patronal, que non se sumou a un acordo que só foi asinado polas organizacións sindicais.

A contía subirá os primeiros seis meses ao 95 % do IPREM 

A reforma eleva a porcentaxe do indicador de rendas múltiples (IPREM) que se utiliza para calcular o subsidio, de forma que a contía subirá os primeiros seis meses ao 95 % do IPREM (uns 570 euros mensuais, 90 euros máis).

Xunto a isto esténdese o subsidio ás vítimas de violencia de xénero e aos emigrantes retornados e equipárase as contías dos subsidios causados por persoas con contrato a tempo parcial cos de tempo completo, o que beneficia principalmente ás mulleres, entre outros cambios.

A norma tamén inclúe o cambio no Estatuto dos Traballadores para que todos os empregados poidan gozar de forma acumulada do permiso de lactación ata os 28 días, unha posibilidade que agora só tiñan aqueles cuxo convenio o recollía.

Todos a favor, coa abstención de PP e Vox

A maioría dos grupos da Cámara Baixa apoiaron a validación, aínda que algúns manifestaron as súas dúbidas acerca da pasarela cara ao emprego que deberán levar a cabo os servizos públicos de emprego.

A portavoz de Podemos Noemí Santana, un dos grupos que fixo decaer esta reforma cando se presentou en xaneiro, manifestou o seu apoio nesta ocasión porque se recupera a sobrecotización ata o 125 % do subsidio por desemprego para os maiores de 52 anos, algo que se eliminaba no anterior intento.

Desde Junts, Josep María Cervera valorou o cambio que introduce o decreto nunha das súas disposicións adicionais que permitirá a organizacións empresariais autonómicas formar parte do Consello Económico e Social (CES).

Outro dos cambios normativos que introduce é a prevalencia do convenio colectivo autonómico sobre os de ámbito estatal, algo polo que se felicitou a deputada de PNV Idoia Sagastizábal, xa que esta medida provén dun pacto alcanzado co Goberno.

Este cambio nos convenios colectivos foi tamén valorado por Bildu, BNG e ERC, cuxo deputado Jordi Salvador considerou que supoñerá un "dumping a favor dos dereitos dos traballadores", mellorando as súas condicións e sen causar dano a ninguén.

Pola súa banda, tanto PP como VOX abstivéronse porque consideraron que o Goberno aproveitou o instrumento do decreto lei para sacar adiante cambios que nada teñen que ver co obxectivo da reforma do sistema asistencial por desemprego, como é o caso da prioridade aplicativa do convenio autonómico.

En concreto, o deputado popular Ángel Ibáñez considerou que este cambio "agravará a fenda entre os traballadores dunhas comunidades autónomas e outras", á vez que xerará "conflitividade e inseguridade xurídica".