O Congreso aproba os impostos temporais ás enerxéticas, á banca e ás grandes fortunas

O pleno do Congreso aprobou este xoves os gravames temporais á banca, ás enerxéticas e ás grandes fortunas, que se recadarán de maneira extraordinaria en 2023 e 2024 con cargo aos exercicios previos para facer fronte ao actual contexto inflacionista.

A proposición de lei que regula os gravames saíu adiante con 186 votos a favor, 152 en contra e 10 abstencións.

O Goberno de coalición contou cos votos a favor de EH Bildu, ERC, Compromís, Más País e BNG, mentres que PP, Cs e Vox se situaron en contra, nun debate ideolóxico entre quen cre que a pobreza se reduce creando máis riqueza e os que defenden que hai que facelo transferindo rendas de quen máis teñen aos máis vulnerables.

Nun plano intermedio máis pragmático, situáronse PNV e PDeCAT, que se abstiveron porque, aínda que comparten a filosofía destes impostos, consideran que o seu deficiente deseño os aboca á nulidade e a devolver o recadado "con cargo á cidadanía a que agora se quere protexer", en palabras da portavoz do PNV Idoia Sagastizabal.

"Cando os tribunais resolvan negativamente, que ninguén diga que os tribunais traballan para os ricos", advertiu Ferrán Bel do PDeCAT.

"Súa e só súa será a responsabilidade política e patrimonial do enorme prexuízo que causarán ao orzamento de todos españois", dixo nun ton máis duro Gabriel Elorriaga do PP.

Ciudadanos e Vox tamén incidiron nas dúbidas sobre a constitucionalidade dos tres gravames.

O da banca e o das enerxéticas, porque non gravan os beneficios extraordinarios senón a marxe operativa e a facturación respectivamente, e o das grandes fortunas por constituír na práctica un tipo estatal non bonificable do imposto sobre o patrimonio que interfire na autonomía financeira das comunidades autónomas.

Para as forzas soberanistas non é abondo

Entre quen se situou a favor dos impostos están EH Bildu ou ERC, que cren que quedan curtos e que deberían implantarse con carácter permanente, aínda que EH Bildu pactou durante a tramitación en comisión que dentro de dous anos se faga unha avaliación por parte do Goberno para decidir se se manteñen.

Tamén con EH Bildu se acordou en comisión que as facendas forais do País Vasco e Navarra xestionen os gravames á banca e ás enerxéticas, aínda que en realidade non teñen cabida nin no concerto vasco nin no convenio navarro porque non son figuras tributarias senón prestacións patrimoniais en forma de imposto.

"Non van poder recadalos nin xestionalos. Quen recadará será o Goberno español e o que fará a Comisión Mixta de Concerto será negociar unha determinada compensación económica", aclarou Sagastizabal do PNV.

A deputada vasca, que lamentou que nos últimos días non houbo disposición a negociar máis cambios, lembrou que a semana pasada, xunto con PDeCAT, lograron que non computen a efectos do gravame ás enerxéticas tanto as tarifas reguladas de luz, gas e butano como os ingresos obtidos de redes de transporte e distribución de electricidade e gas.

Así mesmo, excluíuse do pagamento todos os ingresos obtidos por instalacións de xeración con retribución regulada e retribución adicional en territorios non peninsulares, incluídos os do mercado, e toda a facturación obtida fóra de España.

Da ausencia de negociación queixouse a portavoz de CC Ana Oramas, que só expuxo unha emenda para que os ingresos procedentes da distribución de butano e gasolina ás illas de Canarias non capitalinas non computen para efectos do gravame sobre as enerxéticas.