O Deportivo perde o Teresa Herrera ante o Leganés (1-3)

Último partido de pretemporada para o R. C. Deportivo antes de iniciar a liga o vindeiro sábado 17 de agosto en Riazor. Este acabou con vitoria do Leganés por 1-3 que leva o Teresa Herrera para Madrid. 

Ante máis de doce mil afeccionados e coa vitoria do equipo feminino aínda no aire, a sección masculina do Deportivo enfrontouse ao Leganés cun once con moitos xogadores dos que se presupoñen como titulares. Os Mella, Lucas, ou Mario Soriano non puideron evitar que, no minuto doce de partido, os madrileños se adiantaran cun tanto de penalti de Diego García. A primeira metade mantívose igualada e o marcador non se movería máis ata o tempo de lecer.

Recomezado o xogo, na segunda metade apareceu a perla deportivista de David Mella para poñer as táboas nunha transición que finaliza con perna dereita onde non pode chegar o porteiro "pepiñeiro". O partido parecía que se decidiría na quenda de penaltis, mais entrou en escena o que sería nomeado xogador do partido, Avilés, para decantar o encontro para o Leganés. Primeiro minuto no minuto 82 e despois no 86, en dúas transicións moi parecidas, o extremo enviou o balón ao fondo da rede e puxo o definitivo 1-3. 

Con este resultado o Teresa Herrera marcha para Madrid e o Deportivo pecha a súa pretemporada, coa vista posta no comezo da liga o vindeiro sábado 17 ante o Real Oviedo ás 19:00 en Riazor.