Destrúense 139.700 empregos no primeiro trimestre, a maior caída desde 2020

O paro subiu en 117.000 persoas entre xaneiro e marzo, o que supón un 4,1 % máis ca no trimestre anterior, mentres que a ocupación se reduciu en 139.700 postos de traballo (0,6 %),. Son en ambos os casos os peores rexistros nun primeiro trimestre desde 2020, coa chegada da covid-19, informou este venres o Instituto Nacional de Estatística (INE).

Ao finalizar marzo, o número total de parados situouse en 2.977.900 persoas, a cifra máis alta desde o primeiro trimestre de 2023, e o de ocupados alcanzou os 21.250.000 traballadores, neste caso, a menor cifra de ocupados desde o primeiro trimestre de 2023.    

A ocupación reduciuse no primeiro trimestre en todos os sectores, cos servizos, con 56.100 ocupados menos, á cabeza.

O Ministerio de Economía salienta que o volume de ocupados se consolida por riba dos 21 millóns 

Con todo, nunha avaliación remitida aos medios de comunicación, o Ministerio de Economía, Comercio e Empresa resaltou que os datos da EPA do primeiro trimestre consolidan o volume de ocupados por encima dos 21 millóns de persoas.  

O aumento do paro no primeiro trimestre deste ano é o máis elevado nun primeiro trimestre desde 2020, cando a irrupción da covid-19 levou a unha repunta do desemprego de 121.000 persoas. No primeiro trimestre do ano pasado, o paro subiu en 103.800 persoas, menos do que o fixo en 2024.  

A taxa de paro sobe case medio punto, ata o 12,29 %

A taxa de paro repuntou case medio punto no primeiro trimestre, ata o 12,29 %, o seu valor máis alto desde o primeiro trimestre de 2023. O Ministerio de Economía destacou que o primeiro trimestre do ano se caracteriza por unha "desfavorable estacionalidade" e que, en comparación cun ano antes, a taxa de desemprego é máis dun punto inferior.  

Pola súa banda, a taxa de actividade reduciuse dúas décimas, ata o 58,63 %, tras reducirse o número de activos en 22.700 persoas entre xaneiro e marzo (0,09 %).  

No último ano, o paro reduciuse en 208.500 persoas (6,5 %) e creáronse 615.800 empregos (3 %), e o volume de activos incrementouse en 407.300 persoas (1,7 %).  

Segundo o INE, o número de asalariados reduciuse no primeiro trimestre en 69.800 persoas (0,4 %), concentrándose todo o axuste no emprego temporal (-173.500), xa que os asalariados con contrato indefinido aumentaron entre xaneiro e marzo en 103.700 (0,69 %), ata superar os 15,2 millóns.  

Deste xeito, a taxa de temporalidade retrocedeu ata o 15,7 %, marcando o seu mellor rexistro na serie histórica, segundo subliñou Economía.    

Por sexos, o emprego diminuíu en 52.900 homes e en 86.800 mulleres e por nacionalidade baixou en 106.800 persoas nos españois –inclúe dobre nacionalidade– e en 32.900 nos estranxeiros.

Xunto ao descenso en servizos, a ocupación reduciuse na industria, 38.500 ocupados menos; agricultura, 27.600; e construción, 17.500.

O emprego a tempo completo descendeu en 199.700 persoas, mentres que o de tempo parcial aumentou en 59.900.

Pola súa banda, o número de asalariados diminuíu en 69.800 –os que tiñan contrato indefinido incrementáronse en 103.700, mentres que os de contrato temporal reducíronse en 173.500– e o número de traballadores por conta propia baixou en 69.800 persoas.

O número de asalariados con contrato indefinido marcou récord con 15.226.800.

Por rexións, o maior incremento de emprego este trimestre deuse en Madrid, con 44.700 ocupados máis, e o maior descenso en País Vasco, con 39.200 menos.

En canto ao paro, a maior baixada rexistrouse nas Canarias, 14.500 menos, e o maior incremento, nas Baleares, con 28.300 máis.

O desemprego xuvenil descende en 16.000 persoas e a taxa de paro baixa ao 27,7 %

O desemprego entre os menores de 25 anos descendeu en 16.000 persoas no primeiro trimestre, ata un total de 465.000 desempregados, en tanto que a taxa de paro xuvenil recortouse ata o 27,7 %, 0,82 puntos menos que o trimestre anterior e a máis baixa desde 2008.

Segundo a EPA, na franxa de entre 16 e 19 anos hai 116.300 desempregados, 1.800 menos que no trimestre anterior, en tanto que entre 20 e 24 anos son 348.700, 14.200 menos que no último trimestre.

A evolución á baixa foi posible polo descenso do paro xuvenil nas comunidades máis poboadas, en particular en Madrid e Andalucía, aínda que tamén en Cataluña e na Comunidade Valenciana.

A taxa de paro xuvenil descendeu tamén nas Canarias e no País Vasco, mentres que aumentou no resto de comunidades, Ceuta e Melilla.

En Galicia, a taxa de paro xuvenil sitúase no 28,11 % neste período fronte a cota de 21,39 % do derradeiro trimestre de 2023.

O paro sobe en Galicia un 14 % e a taxa sitúase no 10,4 %

O paro subiu en 16.700 persoas entre xaneiro e marzo en Galicia, o que supón un 14,5 % máis que no trimestre anterior, mentres que a ocupación reduciuse en 8.100 empregos (-0,72 %).

Desta maneira, o número de desempregados na Comunidade quedou nas 131.600 persoas, un 2,5 % menos en termos interanuais, con 3.400 parados menos.

Así, o incremento en Galicia nos últimos tres meses foi moi superior ao da media nacional, onde se incrementou o paro un 4,1 %, ata 117.000 persoas máis sen traballo en comparación con decembro, superando os 2,97 millóns de desempregados.

En canto ao número de ocupados, este situouse en algo máis de 1,12 millóns en Galicia, 24.400 persoas máis que hai un ano (+2,22 %).

Con todo, a taxa de paro en Galicia é do 10,45 %, case dous puntos menos que a media nacional.

Os fogares con todos os seus membros en paro aumentaron ata 977.900 no primeiro trimestre

Os fogares con todos os seus membros activos en paro aumentaron en 49.700 entre xaneiro e marzo, ata un total de 977.900.

Pola súa banda, os que tiñan a todos os seus membros activos ocupados descenderon en 108.500 e situáronse en 11.545.000.

Nos doce últimos meses o número de fogares con polo menos un activo en que todos os activos están en paro reduciuse en 88.100, mentres que os que teñen a todos os seus activos ocupados aumentou en 346.900.