O ERE de MasOrange provocará o despedimento de 23 empregados de R en Galicia
O ERE de MasOrange provocará o despedimento de 23 empregados de R en Galicia
En toda España veranse afectados 795 traballadores, o 17 % do cadro de persoal
Os sindicatos consideran "inxustificado" o expediente de regulación de emprego e esixen a súa retirada
Sede de R na Coruña (Fonte: R Cable)
O expediente de regulación de emprego (ERE) de MasOrange provocará o despedimento de 23 traballadores de R en Galicia. En total, veranse afectados en toda España un total de 795 empregados, o que representa o 17 % do cadro de persoal, formado por 4.607 operarios.
Segundo informou a Unión Sindical Obreira (USO), a situación é "especialmente grave" para os traballadores que operan na Comunidade de Madrid, onde prescindirán de 627 asalariados.
Tras a constitución este mércores da mesa única de negociación fíxose oficial o número de traballadores afectados polo proceso de despedimento colectivo da nova compañía de telecomunicacións MásOrange, xurdida do acordo entre Orange e MásMovil.
A empresa máis afectada será OSP, cun persoal de 2.295 traballadores e unha proposta de extinción de 521 operarios; en Xfera prescindirán de 141; en Euskatel de 39; en Osfi o ERE afectará a 33 operarios, en Lorca a 26, en R Cable despedirán 23 empregados de Galicia e en Telecable Asturias a 12.
Hai unha semana cinco forzas sindicais -entre elas a USO- asinaron un comunicado conxunto no que, ademais de rexeitar "de maneira total este ERE inxustificado" e esixir a súa retirada, pedían "abrir un marco real de negociación e diálogo social en cada unha das empresas afectadas", co fin de respectar a representatividade de cada persoal.
