O Goberno abordará este mes coas comunidades a fin das máscaras en centros sanitarios

O ministro de Sanidade, José Miñones, dixo este venres que antes de que termine este mes haberá unha reunión do Consello Interterritorial de Saúde para estudar a posibilidade de eliminar a obrigatoriedade do uso da máscara nos hospitais e ambulatorios.

Nunha entrevista en RNE recollida por EFE, Miñones apuntou que é un asunto que hai que abordar con "seriedade" e "rigor", e que, polo tanto, teñen que falar cos expertos e dialogar coas comunidades autónomas sobre esta asunto, a través do Consello Interterritorial.

O ministro subliñou que serán os expertos -cos informes técnicos- os que digan como proceder á súa retirada, "se de forma prolongada, definitiva ou gradual", antes de mostrarse convencido de que "estamos máis preto de que sexa un uso recomendado, máis que obrigatorio". 

A última decisión será do Centro de Coordinación de Alertas e Emerxencias Sanitarias. 

Juan Gestal, profesor emérito de Medicina Preventiva e Saúde Pública cre que "hai que volver á normalidade. Refírome á obrigatoriedade. En canto á voluntariedade, que cada quen faga o que queira".

Pilar Martínez, farmacéutica di que "non obrigatoria? Se di o ministerio que así sexa, pois perfectamente. Pero si sería aconsellable que todo o mundo recordara a utilidade da máscara cando está infectado".