O Goberno acusa a Ayuso de "absentismo laboral" por plantar a Sánchez

Isabel Díaz Ayuso insiste en que non acudirá á cita na Moncloa co presidente do Goberno para non "branquear" o pacto entre o PSOE e ERC para un financiamento singular de Cataluña.

Nunha entrevista na Cadena Cope, a presidenta da Comunidade de Madrid dixo este martes que "isto é un deterioración institucional nunca visto e se a foto é que todos estamos de acordo e que todo está ben, creo que nos estamos enganando".

Non o ven así na Moncloa, cren que é un "erro". Para Pilar Alegría, voceira do Goberno, "é un claro exemplo de absentismo laboral, non cumprir cos teus compromisos, coas túas responsabilidades, única e exclusivamente por capricho persoal ou por tacticismo político interno".

O líder do PP tenta liquidar a polémica. Alberto Núñez Feijóo aseguroulle hoxe aos xornalistas que "está suficientemente explicado todo, todo está explicado e a xente entendeuno ben" e volveu amosar o seu apoio a Isabel Díaz Ayuso.

Núñez Feijóo avala a madrileña, que se desmarca do resto de baróns populares. De feito, este venres está previsto que Pedro Sánchez se reúna na Moncloa con outras dúas presidentas autonómicas do PP: María Guardiola de Estremadura e Marga Prohens de Baleares.