Stellantis Vigo recibirá 15 millóns do PERTE do vehículo eléctrico
Stellantis Vigo recibirá 15 millóns do PERTE do vehículo eléctrico
Maroto avanzou que no primeiro trimestre do ano que vén lanzarase unha segunda convocatoria do PERTE VEC
O conselleiro de economía Francico Conde pediulle á ministra un plan máis claro para o sector da automoción, no que se concreten os fondos
A Ministra de Industria, Comercio e Turismo, Reyes Maroto, anunciou este venres que a factoría viguesa do grupo automobilístico Stellantis recibirá 15 millóns de euros do Proxecto Estratéxico para a Recuperación e Transformación Económica do Vehículo Eléctrico e Conectado para a súa iniciativa Aires, polo que esixiu á Xunta "implicación".
Así o sinalou Maroto en declaracións aos medios de comunicación tras presentar o PERTE do Naval en Vigo, onde puxo en valor o traballo realizado polo Goberno para axudar á compañía "no presente e no futuro".
A titular de Industria explicou que no grupo de traballo creado con representantes da empresa, do Executivo central e das tres comunidades autónomas onde Stellantis ten unha factoría están a avaliarse as necesidades da compañía. Sobre a planta de Vigo, indicou que se falou da moi alta tensión, dunha revisión dos prezos que paga a Zona Franca e de cal vai ser o acompañamento das administracións aos investimentos que Stellantis pretende realizar no futuro para adaptar as súas instalacións ao vehículo eléctrico.
"Nós agora mesmo temos un compromiso coa empresa. Estamos a demostralo financiando este primeiro proxecto Aires en Vigo, pero tamén a semana pasada tivemos moi boa noticia, xa que o proxecto de Stellantis na planta de Figueruelas (Zaragoza) é unha realidade e a propia empresa anunciou un novo modelo eléctrico", engadiu.
Maroto subliñou que "se se dan pasos nesa dirección" e confianza, liñas que se poidan acomodar aos seus proxectos de investimento e resolvendo os problemas que a empresa expón "haberá un futuro para unha empresa que é parte da identidade de Vigo e de España porque é o principal fabricante de vehículos". A ministra esixiu "implicación" aos gobernos autonómicos e en concreto á Xunta, reivindicado que o Executivo central puxo sobre a mesa as súas liñas e propostas porque ao grupo de traballo "non só vaise escoitar" senón a "propoñer".
"Os novos proxectos que estamos a traballar con Stellantis requiren de compromiso, de pasar das palabras aos feitos. Quérolle esixir á Xunta que cando sentemos no grupo de traballo propoña cal é o apoio que lle vai dar a este proxecto", destacou Maroto, quen non quixo adiantar que investimento supoñerá esta iniciativa por motivos de confidencialidade, pero si dixo que "garantirá o futuro da fábrica a 10 anos". "Imos deixar de reprocharnos, imos poñernos a traballar. España, Galicia necesita dunha política útil", sentenciou.
O vicepresidente primeiro da Xunta e conselleiro de Economía, Industria e Innovación, Francisco Conde, insistiu en pedir ao Goberno que impulse "canto antes" este novo Perte para o sector automobilístico para dar resposta ás necesidades de investimento de Stellantis e outras empresas debido a que a primeira convocatoria foi "errada" e non permitiu ás compañías satisfacer os seus obxectivos.
En declaracións aos medios de comunicación, asegurou que o Ministerio contará con "toda a colaboración" da Xunta no grupo de traballo para permitir que os fondos europeos si cheguen ás empresas a través do novo PERTE.
O Goberno anuncia 880 millóns de euros en axudas públicas
A ministra de Industria, Comercio e Turismo, Reyes Maroto, anunciou que o Goberno ampliou a 880 millóns de euros as axudas públicas a repartir no marco do Proxecto Estratéxico para a Recuperación e Transformación Económica do Vehículo Eléctrico e Conectado, o que supón aumentar en case 300 millóns de euros os fondos adxudicados na resolución provisional.
No marco da reunión da Alianza do PERTE para a Industria Naval en Vigo, Maroto sinalou que de forma inminente darase a coñecer a resolución definitiva das axudas do PERTE VEC, aínda que adiantou que incrementou a repartición a 880 millóns, o que representa o 29,5 % do orzamento do programa, que ascende a 2.975 millóns de euros e que na publicación provisional supoñía preto do 20 %.
A titular da carteira de Industria, Comercio e Turismo avanzou que no primeiro trimestre do ano que vén lanzarase unha segunda convocatoria do PERTE VEC, xa que na primeira edición non se esgotarán os fondos inicialmente previstos.
