O Goberno aproba a norma para regular os alugueiros de curta duración e perseguir a fraude

O Goberno aprobou este martes o regulamento polo que se crea o Portelo Único Dixital para regular os alugueiros de tempada, turísticos e de cuarto, que espera que estea listo antes de que finalice o ano, e que implica un rexistro previo sen o que estes alugueiros non poderán comercializarse.

A ministra de Vivenda e Axenda Urbana, Isabel Rodríguez, indicou que foi un asunto que quedou pendente na Lei de Vivenda e servirá para regular os contratos de curta duración. 

O decreto, segundo detallou, servirá para incrementar a información dispoñible arredor dos alugueiros de curta duración cun rexistro único sen o cal non se poderá levar a cabo a comercialización destas vivendas en plataformas.    

Como explicou Rodríguez, para a creación do portelo único o Goberno contará co Rexistro da Propiedade para xerar "seguridade xurídica e rigor", xa que o procedemento de rexistro realizarase a través dos rexistradores, detallaron fontes do Ministerio de Vivenda.

"Cando ese aloxamento, cando esa vivenda teña que recibir ese rexistro, que é un número, o Rexistro da Propiedade vai poder certificar que cumpre no caso dos turistas, coas normativas autonómicas de licenzas de vivendas turísticas, que cumpren coas ordenanzas municipais que algúns concellos xa teñen e outros, afortunadamente, están a poñer en funcionamento en relación ás licenzas turísticas e mesmo será capaz de certificar aquelas comunidades de veciños que os seus estatutos prohibisen a implantación de alugueiros turísticos", detallou.

O obxectivo, segundo explicou a ministra, é que o portelo único se conecte co portelo único europeo, que estará dispoñible a partir de maio de 2026.

Así, Rodríguez asegurou que con este real decreto o Goberno consegue "perseguir a fraude, protexer a quen realmente necesitan do aloxamento de tempada, deste tipo de aloxamentos e poñer coto aos aloxamentos turísticos ilegais".   

Ademais, o Consello de Ministros tamén aprobou a distribución territorial dos 200 millóns de euros para a terceira edición do Bono Alugueiro Novo. Rodríguez que virán máis medidas xa que o Goberno non vai parar ata dar solución ao problema que teñen miles de persoas no país.

"A única tensión que me preocupa é o prezo do alugueiro"

Rodríguez eludiu confrontar con Sumar polas medidas que está a adoptar o seu departamento en materia de vivenda, e lembrou que o bono de alugueiro, aprobado polo Consello de Ministros e cuestionado por Sumar, estaba recollido no acordo de Goberno asinado entre PSOE e o partido de Yolanda Díaz.  

Neste sentido, Rodríguez indicou que a "única tensión" que lle preocupa é o prezo do alugueiro e dar resposta ao "sufrimento" da xente en relación ao acceso á vivenda.  

"A miña prioridade está en resolver estes problemas, e se teño que confrontar con alguén, será con aqueles que defenden posturas distintas ás nosas", reiterou a ministra respecto diso da posible confrontación con Sumar polas medidas de vivenda.

Rodríguez quixo desviar esa confrontación cara a aqueles que avogan "polo libre mercado e o sálvese quen poida". "Se teño que confrontar con alguén é con estas posicións da dereita que volven ás mesmas receitas do deixar facer que xa nos levaron a outra crise", concluíu a ministra.

Lembrou, ademais, que Sumar e PSOE subscribiron un acordo de Goberno "selado e asinado", que contempla o bono novo do alugueiro e tamén o desenvolvemento da propia lei de vivenda, para que sexa o máis eficaz posible.

Neste desenvolvemento enmarcou o decreto que hoxe se enviou a información pública, e que regula o rexistro dos alugueiros turísticos e de tempada.

Comparecencia da ministra de Vivenda no Congreso

A Xunta de Portavoces do Congreso aprobou incluír no pleno do próximo mércores, 23 de outubro, a comparecencia da ministra de Vivenda para render contas sobre a súa xestión en materia de vivenda, tal como reclamaran Esquerra, Bildu e o BNG, socios habituais do Goberno.

A comparecencia de Rodríguez foi reclamada por Esquerra, Bildu e o BNG ante a "inacción" do seu departamento e a "falta de medidas" para posibilitar o acceso da cidadanía a unha vivenda digna, e conta co respaldo de PP e Sumar, entre outros grupos.

De feito, o portavoz de Sumar no Congreso, Íñigo Errejón, tamén reclamou un debate monográfico sobre políticas de vivenda e animou ao seu socio do PSOE para aceptar o envite para poder falar da "emerxencia nacional que vive España coa vivenda".