O Goberno apunta que Cataluña recibirá 1.500 millóns menos, despois de que Junts tombara a senda do déficit

A voceira do Goberno e ministra de Educación, Pilar Alegría, di que Cataluña recibirá 1.500 millóns de euros menos despois de que Junts tombara este mércores os obxectivos de estabilidade no Congreso dos Deputados, paso previo á aprobación dos orzamentos xerais do Estado, ao sumar o seu voto en contra aos de PP e Vox.

"Iso significaba, por exemplo, que no caso de Cataluña ían chegar 1.500 millóns de euros máis para podelos aplicar en políticas que benefician a xente, en política educativa, en sanidade ou en dependencia", dun total de 10.000 millóns a repartir entre todas as comunidades autónomas, indicou Alegría.

Con todo, a ministra tratou de restarlles importancia ás derrotas acumuladas polo Goberno no Congreso (tampouco foi aprobada a toma en consideración da reforma da lei de estranxeiría para a repartición de menores migrantes) e achacouno ao simple feito de que o Executivo está en minoría parlamentaria, e iso esixe "máis traballo" para sacar adiante as iniciativas.

En todo caso, rexeitou que a lexislatura corra perigo, a pesar de que necesitan os apoios de Junts para sacar adiante calquera votación na que non conten co PP.

Ao ser cuestionada sobre se é viable que o líder do PSC, Salvador Illa, sexa o novo presidente de Cataluña e Sánchez siga liderando o Executivo central dixo que "desde logo" porque os cataláns dixeron nas últimas eleccións do 12 de maio que querían abrir unha nova etapa liderada polo PSC e nas xerais de hai un ano os cidadáns votaron a favor dun "Goberno progresista".

Sinalou tamén que o Executivo de Sánchez levou a cabo un traballo "serio" neste último ano e así o demostran os datos de crecemento económico, de emprego e de "consolidación de dereitos" e por tanto asegura que esgotarán a lexislatura ata 2027.

"Vai seguir así nos tres anos que nos quedan de lexislatura e, se os cidadáns queren, algunha máis", apuntou Alegría.