O Goberno autorizará o peche de dous dos catro grupos de Endesa nas Pontes

O Ministerio para a Transición Ecolóxica anunciou este luns que autorizará o peche de dous dos catro grupos da central térmica de Endesa nas Pontes e sinalou que prevé supeditar a clausura dos restantes "ao reforzo de variables de dispoñibilidade de potencia no sistema eléctrico".

Nun comunicado destacou que a ministra, Teresa Ribera, trasladou estas decisións, que xustificou tras recibir un informe de Rede Eléctrica de España, nunha reunión con representantes da empresa ante a súa solicitude de peche do complexo.

O Executivo estimou que os "proxectos previstos para a reconversión industrial da zona suman un investimento superior aos 2.500 millóns de euros e xerarán máis de 1.300 empregos directos".

Sobre a petición de clausura, o Goberno precisou que xa dispoñía dun informe de Rede Eléctrica de España, de 2020, para permitir o peche de todos os grupos, pero lembrou que a pasada primavera pediu un novo documento "á vista das tensións provocadas nos mercados enerxéticos pola guerra en Ucraína".

Ademais, xustificou ese texto pola "elevada exportación de electricidade provocada pola seca e a indispoñibilidade de boa parte do parque nuclear francés" e apuntou que o novo informe "contempla escenarios non previstos anteriormente, con distinta participación da coxeración e unha elevada e constante exportación".

Neste ámbito, Transición Ecolóxica referiu a "conveniencia de pechar os grupos inoperativos e que o peche dos outros dous quede condicionado ao reforzo de variables de dispoñibilidade de potencia no sistema eléctrico mediante o aumento da dispoñibilidade da coxeración ou un mecanismo de resposta activa da demanda".

Ribera exhortou a firma enerxética a "promover proxectos de reconversión e investimentos alternativos na zona en cumprimento do Acordo por unha transición enerxética xusta para centrais térmicas en peche, asinado en abril de 2020 entre Goberno, sindicatos e empresas".

Plans de Endesa

Endesa, pola súa parte, comunicou este luns que o Plan de desenvolvemento articulado ante o peche da central térmica das Pontes prevé un desembolso de 2.682 millóns de euros e a creación de 1.361 postos de traballo e valorou o seu "compromiso con Galicia" coas medidas que contempla o proxecto.

O grupo enerxético manifestou que a "clausura da central fixada polo Goberno irá acompañada dun plan social e económico que permitirá á compañía seguir sendo un referente industrial na zona durante as próximas décadas tras medio século de presenza" na localidade.

Así, asegurou que presentou ao Ministerio para a Transición Ecolóxica, a Xunta de Galicia e o Concello pontés "un plan que mostra o compromiso cun proceso de transición enerxética xusta e a creación de valor nas Pontes e a súa contorna".

O procedemento, sinalou, "ten como obxectivo fundamental a substitución dos 1.400 megawatts de carbón das Pontes por 1.300 renovables e incluirá ademais o plan de desmantelamento da central, a instalación de novos proxectos industriais no emprazamento da térmica" ou o "impulso loxístico" á súa terminal portuaria de Ferrol.

A compañía tamén destacou que todos os seus empregados "van recolocarse noutras áreas: o desmantelamento ou os plans de futuro; ou se acollerán a saídas voluntarias".

Respecto diso, a compañía resaltou que o desmantelamento terá unha duración estimada de catro anos e contempla un plan de formación que capacitará ás máis de 130 persoas que participarán nestas tarefas, primando o emprego local; a licitación está preparada e só pendente da recepción efectiva desa resolución de peche.

Sobre a implantación de "novos proxectos renovables", aludiu na súa nota Endesa á creación de ata 2.300 empregos durante a construción de proxectos eólicos que alcanzarán os 1.300 megawatts e outros 274 "directos durante os 25 anos estimados de vida útil dos parques".

Igualmente, avanzou que a "electricidade producida apoiará proxectos industriais de Sentury Tire" anunciados para a contorna das Pontes e tamén incidirá en "un importante preacordo de compravenda de electricidade con Alcoa", sobre o que precisou que xa solicitou á Xunta que sexa un plan de "carácter estratéxico".