A Xunta pide ao Goberno central que achegue o 50 % do investimento en dependencia

O ministro de Dereitos Sociais, Consumo e Axenda 2030 Pablo Bustinduy comprometeuse a manter o incremento do financiamento por parte do Estado do sistema de dependencia, que aumentou un 150 % no últimos tres anos e se triplicou desde 2014. "Mantemos ese compromiso para que nos próximos Orzamentos Xerais do Estado esa senda inédita de crecemento do financiamento se siga mantendo", asegurou á súa chegada ao Consello Territorial de Servizos Sociais e do Sistema para a Autonomía e Atención á Dependencia que se celebra na sede do ministerio.

Fronte ás críticas dos conselleiros do PP de falta de financiamento do Goberno á dependencia, o ministerio de Bustinduy lembrou que a achega ao sistema do Goberno en 2024 foi de 3.411 millóns de euros, fronte aos 1.130 millóns de 2014. Ademais, trasladáronse ás comunidades autónomas 1.500 millóns procedentes de fondos europeos para transformar o modelo de residencias durante 2025 e 2026, explicou o ministro. "España é o único país da Unión Europea que destinou parte dos fondos de recuperación europeos á transformación do modelo de coidados para transformar máis de 60.000 prazas de residencias ao novo modelo de coidados ata o 2026 e para estender e universalizar a teleasistencia en España", destacou Bustinduy.

"Estamos a poñer recursos para que esa transformación empece xa e se vexan os resultados de maneira inmediata", sinalou. "Estamos ante a oportunidade histórica de que esta lexislatura sexa a lexislatura da transformación do modelo de coidados, para que poidamos dispoñer dun sistema público de coidados á altura dos desafíos polas transformacións demográficas que vive o noso país", aseverou.

Goberno e comunidades autónomas analizan nesta reunión o anteproxecto aprobado en primeira volta polo Consello de Ministros para reformar a lei de dependencia e de discapacidade. "Os esteos desta reforma teñen que ver con poñer as necesidades, as preferencias e os desexos das persoas usuarias no centro do sistema, e, por tanto, apóstase pola universalidade da teleasistencia, da accesibilidade universal e por aumentar as prestacións e os servizos do catálogo, por reducir a burocracia", lembrou o responsable de Dereitos Sociais.

Bustinduy destacou que a reforma gozou dun amplísimo consenso tanto na sociedade civil coma no traballo técnico coas comunidades autónomas. "Recolle xa unha serie de achegas por parte das comunidades autónomas, e a nosa vontade é que siga sendo así", engadiu. "Estou convencido de que conseguiremos alcanzar o consenso e o apoio necesario para que esta transformación sexa obxecto dunha política de Estado", concluíu.

Galicia di ao Goberno que xerará frustración se non achega fondos para dependencia

A conselleira de Política Social, Fabiola García, do mesmo xeito que o resto de conselleiros das comunidades autónomas gobernadas polo PP, reclamou máis financiamento por parte do Goberno ao sistema da dependencia e advertiu que se se aproban dereitos sen financiamento, o único que se xera nas familias é frustración. 

Na súa intervención, segundo explicaron a EFE fontes da Consellería, García valorou a intención do Goberno de ampliar dereitos para as persoas dependentes, pero incidiu en que a vontade non sostén o sistema de atención á dependencia. Por tanto, a Xunta pide ao Goberno central que achegue o 50 % do investimento nesta materia, porque nos últimos anos, lonxe de que a achega do Goberno central aumente, o que fai é diminuír.

"Se no ano 2023 o Goberno central achegou un 40 %, no ano 2024 só chegou ao 34,9 %, o cal provoca que a débeda acumulada con Galicia nesta materia supere os 2.500 millóns de euros”, expuxo García durante a súa quenda de palabra. Ao fío desta cuestión, García reiterou: "Aínda que todos estamos de acordo en que hai que continuar avanzando, as comunidades autónomas consideran que se se aproban dereitos sen financiamento, o único que se xera nas familias é frustración”.

Ademais, reprochou que o Executivo central expoña unha modificación normativa que non prevé ningún tipo de financiamento e o faga de costas ás comunidades autónomas e aos concellos, que son as administracións encargadas de atender ás familias. Finalmente, a conselleira lembrou ao ministro que están a cometer os mesmos erros coa lei ELA, que se publicou no BOE hai máis de catro meses e segue sen ter ningún tipo de financiamento económico. Subliñou que a Xunta concede cada ano 12.000 euros aos afectados por esta enfermidade tan agresiva e tan cara, pero que saen integramente dos fondos autonómicos.