O Goberno declara zonas gravemente afectadas pola DINA en 9 comunidades

O Goberno declarou no Consello de Ministros deste luns zonas afectadas gravemente por emerxencias de protección civil en nove comunidades, polas graves consecuencias que deixou a choiva torrencial tras o paso da DINA os primeiros días de setembro e tamén por incendios ocorridos na parte final do verán.

En concreto, son áreas de Andalucía, Aragón, Castela e León, Castela-A Mancha, Cataluña, Comunidade Valenciana, Illas Baleares, Comunidade de Madrid e Rexión de Murcia.

Segundo a ministra portavoz, Isabel Rodríguez, este decreto trata de "completar as competencias das comunidades autónomas, acompañando desde o Goberno con estas axudas ás persoas, empresas e concellos que tiveron danos".

Subliñou como "relevante" que os danos na agricultura serán cubertos pola canle dos seguros agrarios.

Neste caso, sinalou, as axudas van dirixidas a danos persoais e materiais que se produciron, sobre todo en vivenda, establecementos industriais, mercantís ou de servizo.

Tamén comprenden axudas a persoas físicas ou xurídicas e, ademais ás corporacións locais para a recuperación de espazos municipais que se perderon como consecuencia de "estes incidentes", segundo Rodríguez.

Trátase de "activar todos os mecanismos dispoñibles por parte do Estado nesa colaboración coas comunidades autónomas", dixo.

As medidas de recuperación previstas neste acordo están recollidas no Real Decreto 307/2005, do 18 de marzo, cuxa execución corresponde ao Ministerio do Interior.

Entre esas axudas destacan aquelas polos danos máis graves: 18.000 euros por falecemento ou por incapacidade absoluta e permanente; un límite de 2.580 euros por destrución ou danos en utensilios de primeira necesidade; un máximo de 15.120 euros por destrución da vivenda habitual.

Esta semana a xuntanza do Consello de Ministros, que habitualmente se reúne os martes, adiantouse ao luns debido á sesión de investidura do líder do PP, Alberto Núñez Feijóo, que se inicia mañá.