O Goberno mantén que o segundo viaduto do Castro, na A-6, estará listo antes do remate do ano

O ministro de Transportes ratificouse este martes no Senado no seu "compromiso" de que "antes de final de ano" estará concluído o segundo viaduto do Castro.

"En dous anos teremos esa infraestrutura para beneficio de toda Galicia e de todos os veciños e veciñas de Lugo", dixo Óscar Puente

Así respondía o ministro na Cámara Alta a unha pregunta do senador do PP, José Manuel Balseiro, sobre se o Goberno dispón xa de conclusións definitivas sobre as causas do esborrallamento deste viaduto da autovía A-6.

A súa resposta non convenceu o senador do PP, que se preguntou "Que é o que teñen que ocultar vostedes? Que é o que ten que ocultar este Goberno para non poñer as conclusións enrima da mesa?".

Balseiro queixouse de non coñecer as conclusións definitivas entre outras cousas porque o Goberno non contestou a pregunta presentada polo seu grupo por escrito. Insistiu ademais en que en todo caso "haberá que depurar algunha responsabilidade": "Alguén terá que ter algunha responsabilidade cando gasta 26 millóns de euros do erario público e colapsa o viaduto".

Na súa intervención, o parlamentario do PP lembroulle ao titular de Transportes que foi o Goberno de Mariano Rajoy o que levou a autovía A-6 a Galicia, ao que Puente replicou: "Se o que me quere vostede dicir é que vostedes construíron os viadutos que caeron, pois anticípase vostede a algo que eu non ía dicir".