O Goberno propón a José Luis Escrivá como gobernador do Banco de España
O Goberno propón a José Luis Escrivá como gobernador do Banco de España
O ministro de Transformación Dixital traballou no Banco de España, no BCE, na AIReF e no BBVA, pero o PP rexeita o seu marcado perfil político
Carlos Cuerpo elude confirmar a noticia e afirma que seguen traballando co PP nun acordo para substituír a Pablo Hernández de Cos á fronte do organismo
![](https://img-g24-crtvg.flumotion.com/prog24/2024/20240619/fotoescrivatvg.png)
O Goberno propuxo ao PP o nome do actual ministro de Transformación Dixital e Función Pública José Luis Escrivá como gobernador do Banco de España en substitución de Pablo Hernández de Cos, cuxo mandato expirou a comezos do mes de xuño, segundo confirmaron a Europa Press fontes coñecedoras da negociación.
A proposta de Escrivá, adiantada por El País, foi rexeitada polo PP, o cal motivou que se cancelase a comparecencia prevista do ministro de Economía Carlos Cuerpo para este mesmo xoves no Congreso.
Aínda que se trata dun pacto non escrito, é habitual que a renovación dos cargos do gobernador e subgobernador do Banco de España sexa pactada entre o PSOE e o PP, de tal maneira que o partido no Goberno nomea o gobernador e o partido da oposición propón o subgobernador.
José Luis Escrivá ten unha ampla formación e experiencia profesional no ámbito da macroeconomía e as finanzas. Foi xefe da División de Política Monetaria do Banco Central Europeo (1999-2004) e asesor do Instituto Monetario Europeo (1993-1999).
No Banco de España, ocupou a Subdirección do Departamento de Estudos Monetarios e Financeiros e foi xefe da Unidade de Investigación Monetaria no organismo da madrileña rúa de Alcalá.
Ademais, foi presidente da Rede de Institucións Fiscais Independentes da Unión Europea (2015-2019) e presidente da Autoridade Independente de Responsabilidade Fiscal (AIReF) (2014-2020), ademais de economista-xefe e director do Servizo de Estudos do BBVA (2004-2010).
Escrivá, que na pasada lexislatura foi ministro de Seguridade Social, protagonizou algúns desencontros co Banco de España e co seu gobernador acerca de estudos que publicou o organismo sobre a sustentabilidade do sistema público de pensións e a necesidade de reformas, nalgúns casos en sentido contrario ás propostas polo Executivo.
Carlos Cuerpo: "A independencia do Banco de España está asegurada sexa quen sexa o candidato"
O ministro de Economía Carlos Cuerpo asegurou que o Goberno segue traballando co PP nun acordo para a renovación do cargo de gobernador e subgobernador do Banco de España. Faino "sen présa" e coa confianza de que as conversacións cheguen a bo termo.
Antes de participar no Foro Icex, Cuerpo lanzou unha mensaxe de "total tranquilidade" e matizou: "Hai tempo dabondo e o mantemento correcto do Banco de España está asegurado".
Cuerpo rexeita entrar no detalle da negociación co PP e elude facer comentarios sobre persoas cuxos nomes se puxeron enriba da mesa, que "foron moitas", despois de que El País publicase este xoves que o ministro de Transformación Dixital José Luis Escrivá, foi uns dos candidatos propostos polo Goberno.
O ministro tamén aclarou que a independencia do Banco de España está asegurada sexa quen sexa o candidato. Cuerpo pide "prudencia" e manda "unha mensaxe de confianza en canto a que as persoas que substitúan tanto o exgobernador como a actual subgobernadora serán, por suposto, candidatos da mesma solvencia e profesionalidade que mostraron tanto Pablo Hernández de Cos como Margarita Delgado".