O Goberno publicará un mapa cos concellos obrigados a ter zonas de baixas emisións e o seu nivel de cumprimento

O Goberno publicará o próximo luns un mapa cos concellos obrigados a establecer Zonas de Baixas Emisións con información sobre o seu estado de implantación, segundo revelou o Ministerio para a Transición Ecolóxica e o Reto Demográfico (MITECO) no acto Xuntos por un aire limpo celebrado na sede do Ministerio con motivo do Día Internacional do Aire Limpo por un Ceo Azul.

Durante a xornada, a vicepresidenta e ministra para a Transición Ecolóxica Teresa Ribera incidiu na necesidade de investir en políticas que garantan "a boa calidade do aire nos concellos e que contribúan á boa saúde dos cidadáns e a frear o avance do cambio climático".

Tamén insistiu na "importancia de non dar pasos atrás" neste sentido, "como xa está a ocorrer nalgunhas cidades españolas" coa reversión de medidas como as zonas de baixas emisións (ZBE) ou a eliminación de carrís bici.

MITECO lembra que, segundo a Axencia Europea de Medio Ambiente, máis de 20.000 mortes prematuras ao ano en España son causadas pola mala calidade do aire atribuíble aos niveis de óxidos de nitróxeno (NO₂), ozono (O₃) e partículas en suspensión inferiores a 2,5 micrómetros (PM2.5).

Ademais, sinala que o acto tivo lugar un día despois de que a Organización Meteorolóxica Mundial (OMM) publicase o seu último informe sobre calidade do aire e clima, en que destaca o "grande impacto" dos episodios de vagas de calor, "que cada vez se producen con máis frecuencia", sobre a calidade do aire.

Así mesmo, lembra que a OMM sinala que a vaga de calor europea de 2022 provocou "máis contaminación por ozono" e tivo impacto sobre a calidade do aire, a saúde humana e o medio ambiente. "A OMM destaca tamén a importancia de contar con zonas verdes nas cidades para aliviar as coñecidas como illas de calor", engade.

O investigador no Centro de Investigación do Transporte da Universidade Politécnica de Madrid David Lois asegurou que a maior parte da xente “está por esa modificación, no lado correcto da historia”, pero “necesitamos liderados políticos fortes e determinados”. 

“Dise que moita xente non pode renunciar a ningún tipo de desprazamento motorizado, pero resulta que arredor do 30 % dos desprazamentos nas cidades, e non digamos nas medianas e pequenas, teñen menos de dous quilómetros”, destacou Lois.

Informe de calidade do aire do 2022

O pasado mes de xullo publicouse o informe de calidade do aire correspondente ao ano 2022. Así, o informe destaca o dióxido de nitróxeno (NO₂) mantén en 2022 a mellora experimentada desde 2020 do valor límite.

Ademais, en canto ao valor límite anual de NO₂, revela que se segue rexistrando unha única superación, pero nesta ocasión na zona ES0901, nunha área de Barcelona que antes cumpría desde 2019.

En Madrid na zona ES1301, que superaba de forma continua o valor límite anual de NO₂, desde deixa de facelo en 2022.

En relación coa concentración de partículas inferiores a 10 micrómetros, o informe destaca que se mantén a única superación do valor límite diario da zona de Avilés.