O Goberno reclámalle á armadora do buque que provocou a vertedura de pellets o custo da limpeza

O Goberno reclamoulle á armadora do buque Toconao, o barco responsable da vertedura de pellets de plásticos que afectou no principio do ano á costa galega e cantábrica, os gastos que supuxeron a limpeza e os labores de intentos de avistamento da carga extraviada desde o aire.

En concreto, nunha resposta realizada polo Executivo central a unha pregunta escrita formulada polos deputados do grupo parlamentario Sumar José Manuel Lago Peñas e Verónica Martínez Barbeiro, a Administración explicou que foi a Dirección Xeral da Mariña Mercante, do Ministerio de Transportes e Mobilidade Sostible, a que centralizou a reclamación polos custos ocasionados tanto ao Ministerio para a Transición Ecolóxica e o Reto Demográfico como á Sociedade de Salvamento e Seguridade Marítima (Sasemar).

Para ese efecto, solicitouse a ambos os organismos que elaborasen un primeiro documento que recollese a contía global dos danos reclamados, a súa desagregación e un índice ou relación das facturas que os xustifiquen.

Tras isto, procedeuse á incoación dun procedemento de reclamación de responsabilidade por contaminación. No curso deste, remitíronse as facturas ao representante do armador do buque Toconao para que alegase o que considerase oportuno, "tendo en conta que o mesmo colaborou en todo momento contratando a dúas empresas para a limpeza das praias", lembrou o Goberno.

Sobre as devanditas facturas, solicitou unha serie de aclaracións que foron remitidas tanto ao Ministerio como a Sasemar para a súa contestación.

"Unha vez se respondan esas aclaracións, o armador poderá formular alegacións aos importes das facturas e corresponderá a Transición Ecolóxica e a Sasemar valoralas e tomar a decisión definitiva sobre a contía deses gastos, que será a que se plasme na resolución que poña termo a este procedemento", sentencia o Executivo.

Todo iso despois de que os deputados de Sumar preguntasen polas accións que tomou o Goberno para reclamar á empresa armadora os gastos relacionados coa limpeza dos pellets que a principios deste ano se esparexeron pola costa galega.