O incendio das Hurdes e Gata está contido pero segue lonxe de estar controlado

O incendio das Hurdes, que se estendeu á serra de Gata, evoluciona favorablemente pero está lonxe de estar controlado ou extinguido, xa que se reactiva constantemente.

Este sábado, algúns dos 500 veciños desaloxados puideron achegarse unhas horas ás súas casas para recoller medicinas e alimentar os animais.

Ovejuela segue sendo o punto máis quente do incendio que comezou o mércores na comarca das Hurdes e que se estendeu á serra de Gata. Este sábado o tempo axudou os equipos que traballan para controlalo e extinguilo. Os ventos foron menos intensos, houbo máis humidade e as temperaturas máximas tamén descenderon algo. 

Os máis de 600 efectivos despregados na comarca conseguiron conter o lume pero seguen en alerta porque din que o incendio se reactiva continuamente. Os veciños desaloxados confiaban en que a mellora da situación lles permitiría volver ás súas casas, despois de tres noites refuxiados en casas de familiares e en pavillóns deportivos.

"Parece ser que si, que a situación é boa e a ver se nos mandan estan noite á casa, a durmir". "Estamos ben, atendéronos perfectamente, pero... é a nosa casa". "Rabia, tristura, impotencia, pola xente que se lle queimaron as casas, as terras, os animais", contan.

Algúns, coma estes de Cadalso, na serra de Gata, tiveron permiso para achegarse unhas horas ata as súas casas, escoltados pola Garda Civil, para recoller medicinas e alimentar os animais. Algunhas estimacións apuntan a que este incendio arrasou xa preto de 12.000 hectáreas.  O presidente da Xunta de Estremadura volveu animar os cidadáns que teñan algunha sospeita sobre o autor ou autores a que o denuncien.