O incendio dunha cociña obriga a desaloxar un edificio en Outes
O incendio dunha cociña obriga a desaloxar un edificio en Outes
As lapas comezaron na combota e calcinaron a cociña e o teito
A dona, de 72 anos, saíu ilesa e foi quen avisou unha veciña do lume
Un incendio na cociña dun quinto piso obriga a evacuar un edificio na Serra de Outes. A propietaria da vivenda, de 72 anos, resultou ilesa e foi a que avisou do lume unha veciña do inmoble.
Angustia e moito medo foi o que viviron os veciños dun edificio da rúa Castelao na Serra de Outes na xornada de onte. Di unha veciña do edificio que foi a dona do piso a que lle avisou, polo que avisou ao 112.
Parece que o lume se orixinou na cambota, as lapas propagáronse a gran velocidade e a columna de fume era tal que tiveron que desaloxar o edificio. "Veu xente con extintores e logo xa chegou a Garda Civil e xa mandaron desaloxar", explica Mónica, veciña do edificio. "Unha compañeira do centro de día chamoume para dicirme que estaba ardendo o tellado e mesmo xa avisaran aos bombeiros, os cales chegaron moi rápido", engade.
O lume puido extinguirse sen lamentar danos persoais grazas á rápida intervención dos bombeiros de Boiro e os GES de Noia. Xa cara á tardiña os veciños puideron volver ás súas casas, agás os do cuarto andar e a dona do piso incendiado pois as lapas deixaron parte da vivenda sen teito.
