O Índice de Prezos de Consumo en España experimentou unha repunta en maio, por María Loureiro

A inflación aumentou tres décimas en maio, alcanzando o 3,6 % en taxa interanual (comparado co mesmo mes do ano anterior). Isto representa a maior subida desde abril de 2023. Por outra banda, a inflación subxacente, que exclúe os artigos máis volátiles, como alimentos frescos e produtos enerxéticos, tamén repuntou lixeiramente, situándose no 3 %. Esta evolución recente é debida, principalmente, á subida dos prezos de electricidade, fronte á baixada de maio de 2023. Tamén aos prezos dos carburantes, que baixan menos que no mesmo mes do ano anterior. A taxa de variación anual estimada da inflación subxacente (índice xeral sen alimentos non elaborados nin produtos enerxéticos) aumenta unha décima, ata o 3,0 %, rompendo unha tendencia de nove meses á baixa, desde xullo de 2023, cando a taxa estaba no 6,2 %, mentres que a inflación xeral leva tres meses consecutivos á alza.

O Ministerio de Economía atribúe a subida do Índice de Prezos ao Consumo a factores estatísticos principalmente, como o efecto base (comparación cos prezos de hai un ano); porén, tamén hai cambios na metodoloxía de como computar o prezo de venda ao público da electricidade. A partir de 2024, adoptouse un novo método de cálculo do Prezo Voluntario para o Pequeno Consumidor (PVPC). Este método incorpora unha cesta de prezos a medio e longo prazo para evitar fortes oscilacións. Ademais, reducirase progresivamente a vinculación co prezo do mercado grosista (coñecido como pool) para incorporar referencias dos mercados de futuros. En 2024, os mercados de futuros representarán o 25 % do cálculo do PVPC. Pero a pesar deste incremento, a evolución xeral dos prezos está lonxe dos picos alcanzados hai uns anos durante a crise enerxética en Europa.

Para poñer esta evolución de prezos en contexto, a inflación acumulada en España para o período de xaneiro a maio de 2024 é do 1,8 %. Durante o mesmo período do ano 2023, este aumento de índice de prezos cifrábase en 1,9 %, e de xaneiro-decembro 2023, cabe lembrar que pechamos cun 3,3% de IPC. De forma comparativa, a inflación anual en Alemaña aumentou ao 2,4 % en maio de 2024, segundo datos preliminares da Oficina Federal de Estatística (Destatis). Isto representa un incremento respecto ao 2,2 % rexistrado en abril. A inflación subxacente, que exclúe os alimentos e a enerxía, mantívose estable no 3,3 % en maio. En resumo, tanto no caso alemán como no español, os prezos da enerxía ditan a evolución de prezos de economía e poñen de manifesto que o BCE ten poderes relativamente limitados para corrixir esta tendencia inflacionista con tipos de interese alto, que non afectan o consumo enerxético, pero si os investimentos produtivos e de vivenda. Hoxe espera con grande expectativa a publicación do estatístico da inflación europeo. Dependendo da súa evolución, o BCE decidirá finalmente se reducir os tipos de interese ou ben mantelos na súa situación actual. Definitivamente, paga a pena estar atento a como evolucionan os prezos nas vindeiras semanas, non só porque afectarán á nosa carteira, senón tamén porque crearán expectativas nos mercados para o resto do ano…