O INE certifica o freo da economía española no primeiro trimestre

A economía española creceu un 0,2 % durante o primeiro trimestre de 2022, segundo o Instituto Nacional de Estatística (INE), o que supón unha redución dunha décima respecto ao dato preliminar avanzado en abril (0,3 %) e de 2 puntos respecto á subida do PIB do trimestre anterior (2,2 %).

Os datos de contabilidade nacional trimestral difundidos este venres polo INE apuntan a que a demanda nacional (consumo e investimento) restou 0,6 puntos ao avance do PIB, en tanto que a demanda externa (exportacións e importacións) contribuíu ao crecemento con 0,8 puntos.

O principal lastre para o PIB foi o significativo descenso do consumo dos fogares, cunha contracción do 2 %, nun trimestre marcado por un aumento dos casos de covid debido á variante ómicron e á invasión de Ucraína por parte do exército ruso no mes de febreiro.