O leito de moitos ríos galegos continúa desbordado
O leito de moitos ríos galegos continúa desbordado
O tempo da unha tregua pero os ríos seguen arrastrando a auga das intensas choivas da fin de semana
Anegouse A Limia, houbo risco ás beiras do Mandeo e desbordaron o Tambre e tamén o Miño, pero agora o ceo loce despexado, xa non hai nubes despois do moito que choveu nos últimos días.
Pero a pegada da intensa choiva nótase no leito dos ríos que baixan cargados de auga, poñendo en apuros instalacións como as do balneario de Lugo.
"Inflúe moito o que chove na Terra Chá, en Begonte o río Ladra tamén mete moita auga e a parte baixa do balneario que está moi preto do Miño cando chega ao nivel da instalación hai que poñer as bombas a bombear", relata Antonio Garaloces, director do Balneario de Lugo.
Os desbordamentos xa se converteron nunha constante en moitos puntos como este de Lugo.
"É o de todos os anos, o que pasa que este ano foi en xaneiro, agora en marzo e igual non é a última".
Houbo que pechar o paso en numerosas zonas.
"Si, a estrada no paseo fluvial estivo cortada".
Pese a todo, hai quen lembra tempos peores.
"Este ano choveu bastante, pero o río xa ten ido máis alto, eu nacín aquí no barrio e lémbroo moito máis alto".
Moitos miran agora o ceo agardando por unha primavera máis enxoita.
