Baixa a laranxa o aviso da AEMET no litoral de Valencia, onde o peor da DINA xa pasou
Baixa a laranxa o aviso da AEMET no litoral de Valencia, onde o peor da DINA xa pasou
Ata as 12:00 horas deste xoves espéranse acumulados de 40 litros por metro cadrado nunha hora e 100 l/m² en doce horas
As autoridades restrinxen o tráfico e recomendan quedar na casa
A Axencia Estatal de Meteoroloxía (AEMET) baixou de vermello a laranxa o aviso por choivas establecido no litoral de Valencia tras afirmar que o peor desta segunda DINA pasou e ata as 12:00 horas deste xoves espéranse acumulados de 40 litros por metro cadrado nunha hora e 100 l/m² en doce horas.
Estes acumulados serán máis probables en zonas do litoral e poderían producirse nunhas catro ou cinco horas, segundo AEMET, que tamén elevou a laranxa o aviso ata as 12:00 e por acumulados de 50 l/m² nunha hora no litoral de Alacant, onde chove con intensidade nas praias de Denia.
Tamén se estableceu o aviso laranxa no interior de Castelló ata as 17:00 horas de hoxe por precipitacións acumuladas en doce horas de 100 litros por metro cadrado, especialmente na zona da Serra de Espadán.
Este xoves tamén está establecido o aviso amarelo na provincia de Valencia, na metade norte de Castelló e no litoral norte de Alacant por precipitacións de 20 litros por metro cadrado nunha hora e 60 l/m² en doce horas.
No caso da provincia de Castelló, as acumulacións máis importantes están a producirse na contorna da Serra de Espadán, segundo AEMET.
