O Goberno valenciano mantén en 210 o número de vítimas mortais pola DINA

O número de vítimas mortais pola DINA na provincia de Valencia mantense en 210, segundo informou o Centro de Emerxencias da Generalitat de acordo cos últimos datos confirmados polas forzas e corpos de seguridade.

Ademais, outra persoa morreu en Málaga e tres en Castela-A Mancha. A cifra nesta última comunidade actualizouse este domingo tras a localización do corpo sen vida dunha das cinco persoas desaparecidas en Letur (Albacete).

Segundo o Centro Integrado de Datos (CID), ata este sábado pola noite efectuáronse 188 levantamentos de cadáveres, practicáronse 183 autopsias e identificáronse plenamente 67 persoas falecidas.

Os corpos sen vida son trasladados á Cidade da Xustiza de Valencia, onde se habilitou un espazo para levar a cabo as autopsias. Logo, a Unidade Militar de Emerxencias (UME) trasládaos aos sotos do pavillón de Feira Valencia, onde se custodian ata que se entregan ás familias.

Membros da UME acceden ao estacionamento subterráneo do centro comercial Bonaire

Busca de persoas desaparecidas

Cinco días despois da DINA, a busca de persoas desaparecidas segue a ser unha prioridade para os dez mil efectivos de emerxencias desprazados aos concellos afectados. Os cadáveres de tres veciños de Pedralba foron localizados este domingo.

Tamén a fin de semana, membros da UME lograron acceder ao estacionamento subterráneo do Centro Comercial Bonaire. O aparcadoiro, de dous mil metros cadrados, estaba totalmente anegado desde o martes.

As restricións de mobilidade decretadas polo Goberno valenciano non impediron que milleiros de persoas voluntarias chegaran este domingo á zona cero por camiños alternativos para axudar na limpeza.

Pola tarde, o concello de Valencia suspendía todos os traballos en varios puntos pola nova alerta de chuvia.

Labores de limpeza en Paiporta. EFE/Biel Aliño